Sport24.az
Misli Premyer Liqasının V turunun "Sabah" – "Turan Tovuz" oyunundan (2:0) sonra meydan sahibi komandanın baş məşqçisi Valdas Dambrauskas jurnalistlərin suallarını cavablandırdı. Sport24.az xəbər verir ki, mütəxəssis əvvəlcə görüşlə bağlı fikirlərini bildirdi…
– "Sabah" ailəsini, rəhbərliyi, oyunçuları təbrik edirəm. Həftə ərzində bu qələbə üçün çox çalışdıq, işlədik. Bu, inancdır, iş prosesimizə inamımızdır. Getdikcə daha yaxşılaşırıq. Düzdür, 3 həftə idi, qələbə qazana bilmirdik. Bugünkü qələbəni azarkeşlərə həsr edirəm. "Turan Tovuz"a qarşı şans yaratmaq çox çətindir. Sıx müdafiə olunurlar. Rəqib çox yaxşı təşkil olunmuş komandadır. Onlara qarşı qapımızı toxunulmaz saxlamaq önəmlidir. Bütün komandalar "Turan Tovuz"un müdafiəsindən nələrsə götürməlidir. Bu gün rəqibə şans vermədik. Əks-hücumlarda təhlükəli olduqlarını bilirdik. Belə rəqibə qarşı 1-2 qol fürsəti yaradırsan və bundan istifadə etməlisən. İkinci hissədə daha çox təzyiq göstərdik və mükəmməl qol vurduq. Qoldan sonra da hiss edirdim ki, oyun nəzarətimizdədir. İnanan, enerjili olan biz idik. Qələbəyə layiq idik. Bunlara baxmayaraq, hələ də çox şeyi inkişaf etdirməliyik. Əsasən də hücumların qurulması, mövqe hücumları. Hücuma keçidlərdə inkişaf etməliyik.
– İddialı komandalara qarşı yaxşı oynayırsız, ancaq güc nisbətində daha zəif olanlara xal itirirsiniz. Bunun səbəbini nədə görürsüz?
– Əlbəttə, belə situasiya var. Güc nisbətində aşağı olan komandalara qarşı oynamaq çox çətindir. Çünki onlar müdafiədə "avtobus saxlayır". Onların bizim kimi klublara qarşı oyunu daha motivasiyalı olur. Əks-hücumlara, standartlara bel bağlayırlar. Bu, dünyanın hər yerində belədir. Qapalı oynayan komandalara qarşı necə oynamalı, müdafiəni necə yarmalı deyə işləməliyik. Bu tip komandalara qarşı standart vəziyyətlərdə də yaxşı oynamaq lazımdır.
– Heyətdən razısınız, ya hardasa boşluq var?
– Demək olar ki, ən xoşbəxt məşqçiyəm ki, çox yaxşı heyətimiz var və oyunçular motivasiyalıdır, inkişaf etmək, özünü göstərmək istəyir.
