Sport24.az
Misli Premyer Liqasının XII turunun "Sabah" – "Şamaxı" oyunundan (0:0) sonra meydan sahibi komandanın baş məşqçisi Valdas Dambrauskas jurnalistlərin suallarını cavablandırdı. Sport24.az xəbər verir ki, mütəxəssis əvvəlcə görüşlə bağlı fikirlərini bildirdi…
– Milli fasilə oyun ritmimizə böyük təsir etdi. Çətin oyun oldu. Oyuna yaxşı başlamadıq. Rəqibin də çox maraqlı oyun planı var idi. Meydançada birə-bir oynayırdılar. İlk hissədə təhlükəli epizodları oldu. Bizi cəzalandıra bilərdilər. Amma ikinci hissədə üstünlük bizdə oldu. Yarımmüdafiə xəttini gücləndirdik və nəzarəti ələ aldıq. Ən böyük problemlərimiz üçüncü zonada oldu. Son ötürmələrdə çatışmazlıq oldu. Yaxşı oynamağımıza baxmayaraq, qol vura bilmədik. Bir topumuz dirəyə dəydi. Nəticəni ədalətli hesab etmək olar. Daha artığını etməliyik. Bu matçı unutmalı və qarşıdakı matçlara hazırlaşmalı, səhvlərimizi düzəltməliyik. Bizim kimi iddialı komandanın qapıya 6 zərbə endirməsi çox deyil.
– Hücumdakı problemləri nə üçün aradan qaldırmaq olmur?
– Rəqiblər də fərqlidir. Hər oyun eyni qaydada oynamaq olmur. Bəzən istədiklərin alınır, bəzən yox. Hücumda bu gün ötürmələrdə problemlər yaşadıq. Simiçin, Lepinitsanın epizodları oldu. Rəqib də yatmır, onlar da mübarizə aparır. Bu gün "Şamaxı" inadkarlıqla mübarizə apardı. Epizodlarımızdan yararlana bilmədik.
