Dadı-duzu qaçan qərb derbisi...

20-30 il əvvəl olsaydı, nəinki Qərb bölgəsinin, hətta bütün Azərbaycanın diqqəti bu gün keçiriləcək "Kəpəz" – "Turan Tovuz" oyununa yönələrdi. Qərb derbisinin ölkə futbolu tarixində özünəməxsus statusu, "ağırlığı" var idi. Heyif ki, son illər bu iki komanda arasında baş tutan görüşlərin dadı-duzu itib.

Səbəbi iə hamıya aydındı. Birvaxtlar ölkə çempionatına rəng qatan, ab-havanı müəyyənləşdirən, çempionluğa iddialı olan klublar son illər maliyyə sarıdan əziyyət çəkirlər. Düzdü, hazırda tovuzlular Ehtiram Quliyevin sayəsində xoşbəxtdilər. Pul problemi yaşamırlar, heyətlərinə normal oyunçular qata, Kurban Berdıyev kimi tanınmış mütəxəssisi "sükan arxasına" dəvət edə bilirlər. Ancaq derbi o vaxt maraqlı olur ki, qüvvələr nisbəti arasında fərq hazırkı kimi böyük olmasın və ya bərabərə yaxın olsun.

Təəssüf ki, bu gün "boz qurdlar" barədə söylədiklərimizi "sarı-göylər" haqda deyə bilmirik. Ölkənin ikinci böyük şəhərinin təmsilçisi artıq neçə ildi ki, AFFA-nın "ianə"si hesabına ayaq üstə dayanır. Və ən acınacaqlısı odur ki, bunun nə qədər davam edəcəyini heç kim bilmir. Tarixi ənənəsi olan klub bu gün azarkeşləri sevindirəcək nəticələrlə yox, daha çox daxildə yaşanan çəkişmələr, neqativ söz-söhbətlərlə gündəmə gəlir.

Bu gün yenə kağız üzərində Qərb derbisidi. Amma derbi ab-havasını hiss etmirik. Adil Şükürov nə qədər güclü baş məşqçi olsa da, hazırda heyət baxımından "Kəpəz" "Turan Tovuz"dan çox geri qalır. Heç kimə sirr deyil ki, məşqçinin üzünü ağ edən əlinin altındakı material, daha dəqiq desək, sərəncamındakı futbolçulardı. Tək əzmkarlıqla iş bitmir. Futbolda keyfiyyət də vacib şərtdi. Bu göstəricidə isə tovuzlular rəqibindən çox üstündülər. 

İndiki durumda "Kəpəz" nəyə ümid edə bilər? Ən yaxşı halda, hansısa möcüzəli şəkildə əldə edilən heç-heçəyə. Tovuz təmsilçisi isə mövsümə gözlənildiyi kimi başlayıb: beton müdafiə və sürətli əks-hücumlar Berdıyevin vizit kartıdı. Arxada qalan 2 matç tanınmış mütəxəssisin illərdi sadiq qaldığı oyun üslubundan yayınmayacağını göstərir. Yəqin ki, bu gün də eyni ssenari yaşanacaq. Qonaqlar da ki... Nə qədər ki, "Kəpəz"ə sponsor tapılmayacaq, gəncəlilər turnir cədvəlinin zirzəmisində çarpışmağa məhkumdu. Necə deyərlər, könlü balıq istəyənin...