Idman.biz
İki turdan sonra bu qrup elə bil ki, adi futbol üçün yox, "ən maraqlı ssenarilər" üçün yaradılıb. Sanki bu ssenari üzrə hər komanda öz unikal epizodunu oynayır. İlk seriyada — Reykyavikdə — Azərbaycan komandası sanki qəfil soyuğa düşdü: beş top yedik və meydanı "buzlamış yolda dönən təkər" effekti ilə tərk etdik.
O matç AFFA üçün o qədər ağrılı oldu ki, portuqaliyalı mütəxəssis Fernandu Santuşla yolları dərhal ayırdılar — deyəsən, çay qurtarana qədər səbr tükəndi.
Ardınca, bu gün səhnəyə U-21 məşqçisi Ayxan Abbasov çıxdı və onun dirilik gətirən nəfəsi meydanda hiss edildi.
Fransa isə bu serialın "parlaq ulduzu" rolunu oynayır. İlk turda Ukraynaya qarşı "adəti üzrə" qalib gəldilər - gözüyumulu, futbol əzəmətilə. Amma İslandiya ilə görüş elə bir dramatiklik yaradırdı ki, sanki "topu saxlaya bilməsək, pərdə yıxılar" hissi var idi. Mbappé və yoldaşları fərdi ustalıqla özlərini xilas etdilər, sadəcə indi məlum oldu: Fransa favorit belə olsa, "alınmaz qala" deyil, daha çox "qazlı limonad" kimidir — bəzən isti havada ləzzət verir, bəzənsə bir anda daşıb ətrafa dağılır.
Ukrayna turnirin ikinci "epizodu"nu idarə etməyə çalışır — ilk turda Fransa üzərində bir performans göstərməsələr də, Bakıda bizimlə oyunları həm maraqlı, həm də bərabər keçdi. Amma bu komandanın hələ də əsas problemi real nəticə almaqdır: temp var, texnika var, amma final mərhələsində sanki ayağı dolaşır. Belə getsə, ikinci yer uğrunda mübarizədə hər itirilən xal psixoloji yükə çevrilə bilər.
İslandiya isə bu seriala ikinci turda "fırtına epizodu" əlavə etdi. Reykyavikdə bizi vokalla boğdular — beş topla. Fransaya qarşı isə elə oynadılar ki, lazım gəlsə, hətta qalib də gələ bilərdilər. Onlara qarşı əsas iradım budur: texniki ulduzları az idi, differensial fərdi ustalıqda məğlub oldular.
Amma onlar səfərdə də "ölü buz" olmadıqlarını göstərdilər — həm evdə, həm də səfərdə ciddi oyun sərgilədilər. Belə çıxır ki, onlar ikinci yer üçün real iddiaçıdırlar — hətta bir az bəxt üzlərinə gülsə, Fransa üçün əsl "kabus"a çevrilərlər.
Və biz — Azərbaycan. İlk turda Reykyavikdəki 0:5 nəticəsi hələ də yaddaşlardadır; AFFA-nın Santuşla yolları ayırması və Abbasovun gəlişi komandaya yeni ruh gətirdi. İkinci turda Ukraynaya qarşı meydanda "mən buradayam" deyən, hər topu dişləyən, döyüşən Azərbaycan gördük. Qol vurduq, göstərdik ki, "xal bankımız boş deyil".
Müdafiədə səhvlər var, hücumda ideya çatışmır — bəli, amma iradə ilə dirənmək onu göstərir ki, qrupda "statist" deyilik.
Nəticə...
Fransa favoritdir, amma qorxulu gəmi deyil. İslandiya artıq "qrupun sürpriz yükünü" çəkməyə başlayıb və ikinci yer uğrunda ən ciddi nominantdır. Ukrayna texnikayla oynayır, amma nəticəyə çevirməkdə çətinlik çəkir — bu da onların barəsində narahatlıq yaradır. Azərbaycan barədə deyiləcək əsas söz isə budur - qarşıdakı oyunlarda məğlub olmamaq düşüncəsinə hakim olmaq, müdafiədə intizam və formal uğursuzluqlardan ruh düşkünlüyünə qapılmamağı hədəfləyən oyun.
Beləcə, qrupun ssenarisi hələ yazılır, pərdə tam açılmayıb. Amma bir həqiqət var: Azərbaycan artıq bu ssenaridə "sıfır fiqur" deyil. Bal tutan barmaq yalayacaq. Və gəlin buna görə hazır olaq!
Əli Vəliyev
İdman.biz
