Sport24.az
Premyer Liqanın VII turunda "Sabah" səfərdə "Səbail"ə qalib gələrək turnir cədvəlinin ikinci pilləsinə yüksəlib. "Bayquşlar"ın vurduğu qollardan birinin müəllifi olan Coy- Lens Mikels Sport24.az-a müsahibə verib. Almaniyalı legioner komandasının oyunundan danışmaqla yanaşı, bizi maraqlandıran başqa sualları da cavablandırıb.
- Öncə "Səbail" ilə oyunla bağlı fikirlərin maraqlıdı...
- Gərgin oyun olacağını bilirdik və buna hazırlaşmışdıq. "Səbail" doğma meydanda çox yaxşı oynayır. Bunun acısını ilk dəqiqələrdə çəkdik və qapımızdan erkən qol gördük. Amma psixoloji cəhətdən sınmadıq, irəli atıldıq və bizə lazım olan qolları vurduq. Yaxşı oyunlarımızdan birini keçirdik. Evə qələbəylə dönməyimizə sevinirəm.
- Komandanın bərabərlik qoluna imza atdın. Ümumiyyətlə öz performansından razısan?
- Qol vurmağım yaxşı oldu. Amma komanda yoldaşlarımın fərqlənməsinə və komandamın qələbə qazanmasına daha çox sevinirəm. Performansıma gəlincə, üzərimdə daim işləyib ideal formada olmağa çalışıram. Zənnimcə hələ çox çalışmalıyam.
- Geridə qalan 7 tur barədə fikirlərin maraqlıdı...
- Premyer Liqada səviyyəsi yüksəlib, hər tur çətin keçir. Düşünürəm ki, rəqabətin yüksək olması futbolçuların, o cümlədən mənim də inkişafıma müsbət təsir edəcək.
- Növbəti turda "Qarabağ"la üz-üzə gələcəksiz. Çempionla matçda nəyə ümid edirsiz?
- Biz hər oyuna qələbə üçün çıxırıq."Qarabağ"ın gücü, səviyyəsi hamıya bəllidir. Amma bu bizi qorxutmur. Onlara qarşı oyunda da uğur qazanmağa köklənmişik.
ABDULLA İSMAYILOĞLU
