Sport24.az
"Qarabağ"ın adı və nüfuzu ölkə hüdudlarını aşıb deyəndə, bəziləri bunu pafos kimi qəbul edir. Qurban Qurbanovun çalışdırdığı komandanı çox təriflədiyimizi söyləyirlər. Bəli, ağdamlılar hələ ki, qitəmiqyaslı turnirlərin qalibi olmağı bacarmayıblar. Ancaq bir şey dəqiqdi ki, "köhnə qitə"nin aparıcı klubları belə "süvarilər"lə hesablaşır, ona hörmətlə yanaşır, onu ciddiyə alır.
Heç kimə sirr deyil ki, Qurban Qurbanovun komandasının missiyası tək yaşıl meydanla bitmir. Vaxt var idi, "Qarabağ"ın sayəsində işğal altında olan torpaqlarımızın Azərbaycan ərazisi olduğunu dünyaya çatdırırdıq, təmsil etdiyi bölgənin erməni işğalçıların qəsb etdiyini sübut etməyə çalışırdıq. 44 günlük Vətən Müharibəsindən sonra vəziyyət dəyişdi, rəşadətli ordumuzun qəhrəmanları sayəsində ata-baba yurdumuza qayıtdıq.
Düşünmək olardı ki, artıq "Qarabağ"ın missiyası başa çatdı. Klubun bu səviyyəyə çatmasında maliyyə dəstəyini heç vaxt əsirgəməyən Gözəl ailəsinin, inkişafında danılmaz əməyi olan Emrah Çelikelin, Asif Əsgərovun, ümumiyyətlə, Ağdam təmsilçinin böyüməsində zəhməti olan bütün kollektivin işi bununla başa çatdı.
Ancaq yox... "Qarabağ" bu gün elə səviyyəyə çatıb ki, ölkənin ictimai-siyası həyatında baş verən proseslərdə də mühüm rol oynayır. Bakıda keçirilən BMT-nin İqlim Dəyişmələri üzrə Çərçivə Sazişinin Tərəflər Konfransının 29-cu Sessiyası (COP29) çərçivəsində "Qarabağ"ın təşəbbüsü ilə dünyanın tanınmış futbol klublarının rəsmiləri Bakıya gəldilər. "Sky sports"un məşhur idman şərhçisi David Qarridonun moderatorluğu ilə təşkil olunan "İqlim naminə Futbol" tədbirində dünyanın bir sıra nüfuzlu futbol klubları iqlim dəyişmələrinə qarşı mübarizədə öz öhdəliklərini əks etdirən bəyanatlarla çıxış etdilər.
Bu fakt bir daha göstərir və sübut edir ki, "Qarabağ" tək futbol klubu deyil, həm də bir Azərbaycan markasıdı. İngiltərənin "Liverpul" və "Tottenhem", İspaniyanın "Atletiko" və "Betis", Türkiyənin "Fənərbaxça" və "Qalatasaray", İtaliyanın "Udineze", Portuqaliyanın "Portu" kimi klublarının Azərbaycan brendinin çağırışına səs verməsi çox mühüm hadisədi. İllər sonra, hətta COP-50, 100 baş tutanda belə sözügedən alyansın məhz "Qarabağ"ın, Azərbaycan təmsilçisinin təşəbbüsü ilə yaradıldığı dünya ictimaiyyəti tərəfindən qeyd ediləcək ki, bu da ölkəmizin imici baxımından əvəzolunmaz rol oynayacaq.
