Idman.biz
"Qarabağ" futbol akademiyasının sabiq idman direktoru Con Van Loenin Sportal.az saytına müsahibəsi
- "Qarabağ" kənardan necə görünür? Onlar ötən mövsüm də Premyer Liqanın qalibi olublar. Sabiq komandanızın hegemonluğu haqda nə düşünürsünüz?
- Mən "Qarabağ"ı mediadan izləyirəm. Gördüyüm qədər, onlar çempionatda çox asanlıqla qalib gəlirlər. Rəqiblər bu mənada onlar üçün çox zəifdir.
- "Qarabağ" Azərbaycan kubokunun finalında "Sabah"a uduzdu. Bu sizin üçün gözlənilməz olmadı?
- Bəli, "Qarabağ"ın "Sabah"a kubokun finalındakı məğlubiyyəti mənim üçün gözlənilməz oldu. Ehtimal etdim ki, heyətdə daim oynayan futbolçular oynamayıblar.
- "Qarabağ" bu mövsüm Çempionlar Liqasında çıxış edəcək. Sizcə, onlar bu mövsüm əsas mərhələyə qədər yüksələ biləcək?
- Bu, püşkatmadan asılıdır. Bəzən daha böyük klublarla düşməmək üçün şansın gətirir. Əgər "Qarabağ" birlikdə yaxşı işləyən yaxşı komanda yarada bilsələr, istənilən kluba çətin anlar yaşada bilərlər.
- "Qarabağ"ın futbol akademiyası da son illər Avropanın bir sıra ölkələrində keçirilən turnirlərdə çıxış edir. Bu haqda fikriniz necədir? Əvvəlki illərdə bunu çox görmürdük, indi uşaq komandaları müxtəlif turnirlərə gedirlər. Akademiyanın inkişafı baxımından yəqin ki, çox yaxşı haldır?
- Niderlandda keçirilən turnirdə iştirak etmişdik və baş məşqçi Samir Musayev, akademiyanın rəhbəri ilə danışmışdım. İllərlə oynadıqdan sonra onlar yenidən yaxşı təsir bağışlayırlar və bu, bütün Azərbaycan üçün yaxşıdır.
- Azərbaycan futbolu Niderland futbolundan neçə il geridədir və daha çox nədə geri qalır?
- Bilmirəm, amma Niderlandda çempionluğu qazanmağa qadir komandalar daha çoxdur. Azərbaycanda yalnız "Qarabağ"dır. Bu, daha çox sərmayə qoymaqla və akademiyaları daha yaxşı təlim, daha yaxşı məşqçilər hazırlamaqla dəyişdirilməlidir. Mən onu da bilirəm ki, daha çox pul ayrılmalıdır, akademiya uşaqlarına daha çox fikir vermək və hər şeyə effektiv şəkildə nəzarət etmək üçün yaxşı akademiya rəhbəri lazımdır.
- Yəqin ki, "Qəbələ" futbol akademiyası ilə tanışsınız. Klub akademiyanın fəaliyyətinin məhdudlaşdırıldığı barədə bəyanat yayıb. Akademiyalar bağanırsa, futbolumuz necə inkişaf edəcək?
- Futbol akademiyaları bağlanırsa, siz bir daha istənilən milli komanda yarada bilməyəcəksiniz. Çünki oradan heç bir gənc oyunçu gəlməyəcək. Futbol akademiyaları olmasa, Azərbaycanda futbol "öləcək". Bu, bütün futbol klubları və peşəkar oyunçu olmaq istəyən gənc oyunçular üçün arxadan zərbədir.
İdman.biz
