Idman.biz
"Düşünürəm ki, Azərbaycan derbisi gərgin mübarizə şəraitində keçəcək".
Bu sözləri AZƏRTAC-a açıqlamasında veteran futbolçu Ceyhun Sultanov Misli Premyer Liqasının "Zəfər turu"nda keçiriləcək "Qarabağ" - "Neftçi" oyunu barədə danışarkən deyib.
Mütəxəssis hər iki komandanın qələbə üçün meydana çıxacağını bildirib: "Həmişə olduğu kimi, bu dəfə də belə olacaq. Hər iki tərəfdə aqressivlik hiss olunur. Bizi çox maraqlı qarşılaşma gözləyir. "Neftçi"nin yüksəlişi futbolçularının yüksək keyfiyyətə malik olması ilə əlaqəlidir. Hətta zaman keçdikcə daha da yaxşı oyunlar nümayiş etdirə bilərlər".
O, "Qarabağ"ın ikinci heyətlə çıxış edə biləcəyini söyləyib: "Qurban Qurbanov böyük ehtimalla UEFA Çempionlar Liqasının əsas mərhələsində İngiltərənin "Çelsi" klubu ilə matçdan (2:2) sonra əsas heyətdə yer alan futbolçuları derbi qarşılaşmasında meydana buraxmayacaq. Hər bir halda iki komandanın futbolçuları keyfiyyət baxımından heç də biri-birilərindən geridə qalmırlar. Bu, baxımdan oyun barədə proqnoz vermək çox çətindir".
Qeyd edək ki, "Azersun Arena"da təşkil olunacaq "Qarabağ" - "Neftçi" görüşü saat 18:44-də başlayacaq. Hazırda Ağdam təmsilçisi 20 xalla turnir cədvəlində ikinci, Bakı klubu isə 15 xalla yeddinci pillədə qərarlaşıb.
