Ceyhun Sultanov: "Qarabağ" "Ferentsvaroş"a fərdi və mövqe səhvlərinə görə məğlub oldu

"Qarabağ" UEFA Çempionlar Liqasının pley-off mərhələsinin "Ferentsvaroş"la (Macarıstan) cavab matçında fərdi və mövqe səhvlərinə görə məğlub olub.

Bu barədə "Report"a Azərbaycan millisinin sabiq yarımmüdafiəçisi Ceyhun Sultanov açıqlama verib.

46 yaşlı veteran futbolçu "köhlən atlar"ın Macarıstan təmsilçisinə məğlubiyyətinn səbəbi ilə bağlı fikirlərini bölüşüb:

"Qarabağ" ilk oyundan fərqli ikinci matçda bir qədər ehtiyatlı olmağa çalışdı. Düşünürəm ki, komanda qol vurduqdan sonra rahatlaşdı. Fikrimcə, fərdi və mövqe səhvlərinə görə məğlub oldular".

Yığmanın sabiq üzvü Tofiq Bəhramov adına Respublika stadionunun meydanının "Qarabağ"ın oyun üslubuna uyğun olmadığını bildirib:

"Meydanın səviyyəsi "Qarabağ"ın sərgilədiyi oyuna uyğun deyildi. Komandanın oyun üslubu elədir ki, meydan ideal vəziyyətdə olmalıdır. Amma təəssüf ki, Tofiq Bəhramov adına Respublika stadionunda meydan istənilən səviyyədə deyildi".

C.Sultanov Macarıstan çempionunun yaxşı kollektiv olduğunu söyləyib:

"Qarabağ"ın əsas mərhələyə vəsiqə qazanmasına sevinirik. Amma "Ferentsvaroş"un pis komanda olduğunu düşünmürəm. İlk oyunun nəticəsi mərhələni keçmək anlamına gəlmirdi. Bildirmişdim ki, ikinci matçda çətin olacaq. Şükürlər olsun, "Qarabağ" qollarını vura bildi. Qol vəziyyətlərindən yararlana bilməsəydilər, mərhələni keçən tərəf biz olmayacaqdıq. İstənilən halda, "Qarabağ"a həmişə inam var. Komandanın oyun üslubu var və mərhələni keçməyə layiq idilər. Uğurlar arzulayıram, inanıram ki, Azərbaycanı bu il də layiqincə təmsil edəcəklər".

Qeyd edək ki, "Qarabağ" UEFA Çempionlar Liqasının pley-offunda "Ferentsvaroş"u iki oyunun nəticəsinə (3:1, 2:3) görə məğlub edərək əsas mərhələyə vəsiqə qazanıb.