İdman.biz
"Millimizi ağır oyun gözləyir".
İdman.biz xəbər verir ki, bunu Azərbaycan millisinin sabiq futbolçusu Ceyhun Sultanov deyib.
O, Millətlər Liqası çərçivəsində Azərbaycan millisinin İsveç yığması ilə qarşılaşacağı oyunu şərh edib.
Sultanovun sözlərinə görə, millimizin baş məşqçisi Fernandu Santuşun əsas heyətdə kimləri oynadacağı və hansı taktika ilə çıxış edəcəkləri bizə məlum deyil: "Çünki yeni baş məşqçimizin milli ilə ilk sınağı olacaq. Bu səbəbdən matçla bağlı danışmaq bir az çətindir. Santuşun indiyədək işlədiyi komandalarda futbolçuların keyfiyyəti yüksək olduğu üçün hücumameylli və baxımlı futbol göstərən bir məşqçi olub. Bu da futbolçuların sayəsində baş verib. İndiki dönəmdə isə bizim yığmada o cür keyfiyyətli futbolçular olmadığı üçün müdafiə futbolu oynayacaqlar. Qapalı futbol oynayıb əkshücumlarda rəqibi yaxalamağa çalışacağıq".
Onun sözlərinə görə, bundan öncə isveçləri ev matçında məğlub etdiyimiz üçün rəqib bizdən necə lazımdır revanş almağa çalışacaq: "Düşünürəm ki, ağıllı futbol oynamaq lazımdır. Rəqibə imkan vermək lazım deyil ki, maksimum dərəcədə bizim qapımıza yaxınlaşsın və standart vəziyyətlərdən az istifadə etsinlər. Çox cərimə almaq olmaz. Belə ölkələr start vəziyyətdən yaxşı istifadə edirlər. İlk oyun olduğu üçün futbolçular hələ baş məşqçinin nə istədiyini tam olaraq anlamırlar. Bu baxımdan çətin olacaq. Hər bir halda millimizə uğurlar arzulayıram".
Qeyd edək ki, Azərbaycan-İsveç qarşılaşması bu gün Tofiq Bəhramov adına Respublika stadionunda saat 20:00-da baş tutacaq.
Banuçiçək Hüseynli
İdman.biz
