Sport24.az
Konfrans Liqasının III mərhələsinin cavab matçında "Zirə" "Osiyek" səddini aşaraq tarixində ilk dəfə pley-off mərhələsində oynamaq hüququ qazandı. Gərgin keçən matçdan sonra "qartallar"ın futbolçusu Ceyhun Nuriyev Sport24.az-ın əməkdaşının suallarını cavablandırıb.
- Gərgin keçən 90 dəqiqə, oyunun əlavə vaxta getməsi və sonda penaltilər seriyası... Matçla bağlı fikirlərini bölüşərdin.
- Hələ "Osiyek" bizə rəqib olanda demişdim ki, bizi çox çətin iki qarşılaşma gözləyir. Elə də oldu. Səfərdən sərfəli nəticəylə gəlsək də, Bakıda rəqibin daha aqressiv olacağını, revanş almaq istəyi ilə meydana çıxacağını gözləyirdik. Sözün düzü, Xorvatiya təmsilçisi gözlədiyimizdən daha çətin komanda oldu. Onlar iki dəfə hesabda önə keçməyi bacardılar. Üzərimizdə bir qədər yorğunluq da var idi. "Sabah"la ağır çempionat oyunundan sonra "Osiyek"lə oyuna hazırlaşmışdıq. Pley-offa vəsiqəni təmin edəcəyimizə inanaraq oyuna çıxmışdıq. Və sonra tökdüyümüz tər, çəkdiyimiz əziyyət bəhrəsini verdi.
- Oyunun taleyinin "lotoreya"da həll olunacağını gözləyirdiz?
- Səmimi deyim ki, oyunun müqəddaratının 90 dəqiqədə həll olunmasını istəyirdim. Buna baxmayaraq, Görüşün əlavə vaxt qədər uzanacağını da ehtimal edirdik. "Şerif"lə cavab matçında azlıqda qaldığımızdan cütün taleyinin penaltilər seriyasında həll olunmasını istəyirdik. Buna nail olduq, sadəcə, bəxtimiz gətirmədi. Bu üzdən xorvatlarla qarşılaşmada "lotoreya"nı arzulamırdıq. Şükürlər olsun ki, penaltilər seriyasından üzüağ çıxdıq.
- Penaltilər seriyasında şansını boşa verənlərdən biri də sən oldun...
- Əksər hallarda penalti zərbəsinin ortaya vurmağa üstünlük verirəm, bu dəfə də elə etdim. Ancaq rəqib qapıçı bunu hiss etdi və zərbəni dəf etdi.
- Pley-offda "Omoniya" ilə qarşılaşacaqsız. Bu klub barədə məlumatınız var?
- Pley-offa qədər gəlməyimizə çox sevinirəm. Amma hədəfimiz qrupa düşməkdi. Əlbəttə ki, "Omoniya" "ağır" komandadı. Bizi qarşıda əvvəlki oyunlardan daha çətin iki matç gözləyir. Kipr təmsilçisi həm təcrübəli, həm də güclüdü. Bura baxmayaraq, gücümüzə inanırıq. Meydanda var qüvvəmizlə döyüşüb hədəfimizə çatmağa çalışacağıq.
ABDULLA İSMAYILOĞLU
