Sport24.az
"Neftçi"nin baş icraçı direktoru Cenk Sümerin Sport24.az saytına müsahibəsi
- "Şamaxı" ilə görüşün son saniyələrində "Neftçi" qələbəni əldən verdi. 2:2-lik bərabərliyi necə şərh edərdiniz?
- Hər iki komanda əlindən gələni etdi. Bəzən olmur, son dəqiqə qolu ilə qələbə qazanacağını düşünündüyün anda, xal itirirsən. Görünür ki, inkişaf dönəmindəyik. Müəyyən çatışmazlıqlar olsa da, yolumuza davam edirik. "Şamaxı" səfəri heç kim üçün asan keçmir. Ümumilikdə komandamızın göstərdiyi performansdan məmnunam. İnşallah, mövsümün sonunda hədəflərimizə çatacağıq.
- Sonda "Neftçi"nin qapısına təyin edilən penalti barədə fikirləriniz necədir?
- Matçın sonunda yaşananlar adamı üzür. Son saniyədə verilən penalti mübahisəyə açıqdır. Üzücü tərəfi budur. Önümüzdəki matçlara baxacağıq.
- "Şamaxı"nın birinci qolundan öncə ofsayd olduğu kadrlardan aşkar görünür, dediyiniz kimi, penalti də mübahisəyə açıqdır. Sizcə, nəyə görə bütün bu mübahisəli epizodlar "Neftçi"yə qarşı olur?
- Hər kəs üçün ədalətli olmaq lazımdır, tək bizə qarşı yox. Hakimlər adil olmalıdırlar. Federasiya bunun üçün ciddi yatırımlar edir. Hakimlər də öyrənirlər, dərs alırlar. Onlar da qış fasiləsində ölkə xaricində hazırlıq keçdilər. Buna görə də biz hakimlərdən yaxşı siqnallar gözləyirdik. Amma təəssüf... "Şamaxı"nın ilk qolu zamanı ofsayd olduğu dəqiqdir. Bunu yan xətt hakimi görə bilmədi. İkinci qol epizodunda isə hücumun əvvəlində foul var idi. Desəm ki, hakim duman olduğu üçün görə bilmədi, yalan olar, çünki epizod düz gözünün qarşısında idi. Qapımıza təyin edilən penaltiyə gəldikdə isə, bizim oyunçumuz havaya qalxdı, rəqiblə mübarizə zamanı topa müdaxilə etdi, burada dirsəyin hərəkəti avtomatik idi. Dünyanın heç bir yerində bu epizodu kobudluq olaraq qiymətləndirməzlər. Amma burada qiymətləndirildi. Baş hakim epizodu gördü və lehimizə cərimə zərbəsi təyin etdi. VAR isə epizodla bağlı fərqli düşüncə irəli sürdü, orada foul olduğunu düşündülər. Bu qərar doğru deyil. Təbii ki, bunlar bizi üzür. Özü də yüksəlişdə olduğumuz bir dönəmdə. Amma bunlar bizi dayandıra bilməz. Qarşıdakı matçları qalib başa vurmağa davam edəcəyik. Biz özümüz-özümüzlə hesablaşırıq. Rəqib ayırd etməyəcəyik. Sonuna qədər avrokuboklara vəsiqə üçün mübarizə aparacağıq. Ümidvaram ki, hər şey yaxşı alınar. Bu, sadəcə bizim oyunlarımız üçün deyil, Azərbaycan futbolu üçün önəmlidir. Hakim hakimliyini tam olaraq edəcək ki, adil olacaq ki, futbol oynanılsın. Nəticələr onsuz da Avropada görünəcək.
- Yeni transfer Breno Almeyda "Şamaxı" ilə matçda "Neftçi"nin heyətində debüt etdi. Onunun çıxışından razı qaldınız?
- İlk matçı idi. Qısa müddətdir bizimlədir. Ona görə də bir qədər adaptasiya dövrü keçməlidir. Üstəlik, qış toplanışını da bizimlə keçməyib. Məncə, yaxşı olacaq, səviyyəsi bəllidir. Baş məşqçimizin də inandığı futbolçudur. Bir neçə oyundan sonra faydası birlikdə görəcəyik.
- Vensan Abubakar ikinci hissədə meydana daxil oldu və 2 qol vurdu. Onun peformansını necə dəyərləndirirsiniz?
- Abubakarı elə bunun üçün transfer etmişik. Qolun əvvəlində də yanımdakılara dedim ki, belə matçlarda Abubakar qolunu vurar. Cümləmi bitirdim və dərhal qol oldu. Abubakar peşəkardır, işini yerinə yetirir. Sadəcə "Neftçi" üçün yox, Azərbaycan üçün bir şansdır. Bu cür xarici ulduzların Azərbaycana gəlməsi asan deyil. Onların da burada layiqli şəkildə işini görməsi məni klub idarəçisi, futbol azarkeşi olaraq şad edir. İnşallah, davamı da gələcək.
