Çempionluq yenə də təxirə salınacaq?

Misli Premyer Liqasının çempionunun müəyyənləşməsi təxirə düşüb.

İdman.biz xəbər verir ki, XXXI tur qızıl medalın sahibinin müəyyənləşməsi üçün yetərli olmayıb.

"Qarabağ" öz meydanında "Neftçi"ni 3:0 hesabı ilə məğlub edərək xal sayını 76-ya çatdırıb. Amma "Sumqayıt"ı qəbul edən "Zirə" də turu itkisiz keçib. Qəsəbə klubu 3:1 hesablı qələbə ilə 15 xallıq fərqi qoruyub.

Bu isə o deməkdir ki, çempion qarşıdakı turda da rəsmiləşə bilər. Sona 5 tur qalmış olan 15 xallıq fərq bir büdrəmə, bir uduzulmayan matçın yetərli olması anlamına gəlir.

Amma çempionluq yenidən təxirə də düşə bilər. Bu həftəsonu keçiriləcək görüşlərdən asılı olacaq.

Aprelin 26-da "Zirə" Tovuzda "Kəpəz"in qonağı olacaq. Bakı klubu büdrəsə, "Qarabağ" meydana çıxmadan qızıl medalları təmin edəcək. Lakin Rəşad Sadıqovun yetirmələrinin autsayderlərdən birinə xal bağışlaması o qədər də real deyil.

"Zirə" xal itirsə, bir gün sonra "Sabah"ın qonağı olacaq Qurban Qurbanovun komandası meydana çempion statusu ilə çıxacaq. Qəsəbə təmsilçisi qalib gəlsə, "Qarabağ" xal qazanmalı olacaq. Ağdam təmsilçisi "Sabah"a uduzmasa qızıl medalları boynuna taxacaq.

Əgər "Zirə" xal itirməsə və ardınca da uğursuz mövsüm keçirən Vasili Berezutskinin yetirmələri liderə dişini göstərsə, çempionluq XXXIII tura təxirə düşəcək. Həmin turda "Zirə" "Turan Tovuz"u, "Qarabağ" "Sumqayıt"ı qəbul edəcək.

Qeyd edək ki, 11 qat ölkə çempionu olan "Qarabağ" yarışın ən titullu komandasıdır.

İdman.biz