Idman.biz
UEFA və Avropa Super Liqasının rəsmiləri 2027-ci ildən Çempionlar Liqasının formatında ciddi dəyişikliklər etməyi planlaşdırır.
İdman.biz İspaniyanın "COPE" nəşrinə istinadən xəbər verir ki, yeni modelə əsasən turnirdə 36 komanda iştirak edəcək, lakin onlar iki qrupa bölünəcək.
Hər klub səkkiz oyun keçirəcək – dördü evdə, dördü səfərdə və yalnız öz qrupundakı rəqiblərlə qarşılaşacaq.
Birinci qrupda UEFA reytinqində ən yüksək göstəriciləri olan 18 klub, ikinci qrupda isə qalan 18 komanda yer alacaq. Birinci qrupun ən yaxşı səkkiz komandası birbaşa 1/8 finala yüksələcək, digərləri isə əlavə mərhələlərdə mübarizə aparacaq.
Bundan başqa, UEFA ənənəvi TV yayımını dayandıraraq, "Netflix"ə bənzər öz striminq platformasını işə salmağı nəzərdən keçirir. Bu, azarkeşlər üçün daha əlçatan model olacaq və klubların gəlirini artıracaq.
Hazırda layihə müzakirə mərhələsindədir və yekun qərar yaxın aylarda veriləcək.
