Çempionlar Liqasında püşkatma mərasimi keçiriləcək

Qitənin ən nüfuzlu klub turniri olan UEFA Çempionlar Liqası yenidən start götürür. Sport24.az xəbər verir ki, bu, Avropanın elit klub yarışmasının 70-ci mövsümü olmaqla yanaşı, UEFA Çempionlar Liqası adlandırıldıqdan sonra 33-cü, eləcə də yeni formatda ilk mövsümdür.

Ötən gün oynanılan pley-off mərhələsinin cavab qarşılaşmalarından sonra qitənin əsas klub turnirinin liqa etatında mübarizə aparacaq bütün kollektivlərin adına aydınlıq gəlib. Yarışda ən çox təmsilçisi olan ölkələr 5 klubla İtaliya və Almaniyadır. İngiltərə, İspaniya və Fransanın isə 4 klubu UEFA Çempionlar Liqasının əsas mərhələsində yarışacaq.

İtaliyadan "İnter", "Milan", "Yuventus", "Atalanta" və "Bolonya", Almaniyadan "Bayer Leverkuzen", "Ştutqart", "Bayern Münhen", "Leypsiq" və "Borussiya Dortmund" mübarizə aparacaqlar. İngiltərəni turnirdə son çempion "Mançester Siti", "Arsenal", "Liverpul" və "Aston Villa", İspaniyanı La Liqanın qalibi "Real Madrid", "Barselona", "Jirona" və "Atletiko Madrid", Fransanı PSJ, "Monako", "Brest" və "Lill" təmsil edəcək. Niderlanddan UEFA Çempionlar Liqasının əsas mərhələsində PSV və "Feyenoord", Avstriyadan "Şturm Qrats" və "Salzburq", Portuqaliyadan "Sportinq" və "Benfika", Belçikadan "Brügge", Şotlandiyadan "Seltik", Ukraynadan "Şaxtyor", Serbiyadan "Srvena Zvezda", Xorvatiyadan "Dinamo Zaqreb", Çexiyadan "Sparta Praqa", İsveçrədən "Yanq Boyz", Slovakiyadan "Slovan Bratislava" kollektivləri yarışacaqlar.

Bu gün isə UEFA Çempionlar Liqasında əsas mərhələnin püşkatma mərasimi keçiriləcək. Monakoda təşkil ediləcək tədbir Bakı vaxtı ilə saat 20-də start götürəcək.