Sport24.az
Ötən həftənin cümə günü futbol üzrə XXXIV ölkə çempionatı start götürdü. Uzun fasilədən sonra azarkeşlər 12 komandalı çempionat izləyəcək. Bəs ilk tur necə yadda qaldı? Aşağıda qısa olaraq keçirilən oyunları təhlil edəcəyik.
"Karvan" - "Qəbələ" 1:1
Mövsümün açılış oyununda qollu bərabərlik qeyd alındı. "Qəbələ" hücum planında daha üstün görünsə də, nominal meydan sahibləri topa daha çox sahib olmaq istəyirdilər. Bundan başqa yevlaxlılar intizamlı oyunu da diqqət çəkdi. Kaxaber Tsxadadzenin yetirmələri isə xoşbəxtliyi rəqib qapısı önündə axtarır, daha açıq futbol sərgiləməklə yadda qaldılar. "Qırmızı-qaralar" ilk yarıda yaxaladıqları qol imkanlarından maksimum istifadə etsəydi, oyunun taleyini birinci hissə həll edə bilərdilər. Ancaq bunu bacarmadılar. Bəlkə nominal qonaqlar ilk oyun həyacanını üzərlərindən ata bilmədilər və bu üzdən yalnız 1 xalla kifayətləndilər.
"İmişli" - "Turan-Tovuz" 0:1
Oyundan öncə demək olar ki, hər kəs Qurban Berdıyevin komandasının nominal meydan sahiblərini asanlıqla məğlub edəcəyini düşünürdü. Lakin 90 dəqiqə göstərdi ki, Qərb təmsilçisi heç də düşünüldüyü kimi qorxulu, rəqibdən bir neçə baş üstün komanda deyil. "Boz qurdlar"ın qələbə qolunu əsas vaxta əlavə olunmuş 8-ci dəqiqədə vurması isə sadəcə xarakterin göstəricisidir. Tovuzlular Berdıyevin ənənvi "uzun ötürmə" taktikasına sadiq qalıb 3 xalı qazanmağı planlaşdırsa da, "İmişli"nin futbolçuları rəqibin oyununu "oxumağı" bacarırdı. Qərblilərin ifasında kəskin ötürmələr çatmırdı, hücumçular cərimə meydançasının daxilində "dişsiz" görünürdü.
Bəlkə də ilk tur olduğu üçün tovuzlular bir qədər "çiy" təsir bağışladılar. Hər halda növbəti həftələrdə Berdıyevin komandasının nə dərəcədə iddialı olacağını görəcəyik. "İmişli"yə gəlincə, bu komanda barədə geniş fikir söyləmək olmur. Qarşıdakı turlar "pələnglər"i nəyə qadir oldğunu göstərəcək.
"Neftçi" - "Şamaxı" 1:1
"Ağ-qaralar" çempionatın ilk turunu qələbə ilə başa vurmalıydılar. Xüsusilə ikinci yarıda Samir Abasovun komandası həm topa nəzarət edir, həm də oyun üstünlüyünə malik idilər. Sadəcə, son nöqtəni qoymaqda çətinlik çəkirdilər. Bəlkə də I tur aldadıcı ola bilər. Ancaq yeni mövsümün ilk oyunu göstərdi ki, ötən illə müqayisədə komanda daha yaxşı təsir bağışlayır. Futbolçular daha həvəsli görünür, qarşıya qoyulan məqsədə çatmaq üçün sona qədər mübarizə aparır.
"Sumqayıt" - "Kəpəz" 3:0
Turun yeganə böyükhesablı qələbəsi "gənclər şəhəri"ndə qeydə alındı. "Kimyaçılar" matçın taleyini ilk hissədə artıq həll etdilər. Yeni transferlər heç də pis təsir bağışlamadılar. Saşa İliçin komandası hücum planında inamlı görünsələr də, təəssüf ki, eyni sözləri müdafiə barədə söyləmək çətindir. Düzdü, komanda "Kəpəz"lə matçda qapısında qol görmədi. Ancaq bu "kimyaçılar"ın müdafiə xəttinin yaxşı oyunundan çox, qonaqların hücum xəttinin zəif olmasından irəli gəldi. "Sumqayıt" yaxın vaxtlarda qeyd olunan problem aradan qaldırmasa, qarşıdakı turlarda bunun acısını çəkəcək.
Qonaqlar isə Sumqayıt səfərində çox sönük təsir bağışladılar. Adil Şükürovun komandasıistər müdafiədə, istərsə də hücumda zəif oyun nümayiş etdirməklə yadda qaldı. Xüsusi ilə sol cinah müdafiəçilərinin çox zəif olması diqqət çəkdi. İki qol birbaşa cinah keçidlərindən sonra, digəri isə sol cinah müdafiəçisinin qapıçı meydançasındakı səhvindən sonra vuruldu.
"Zirə" – "Araz-Naxçıvan" 1:1
Turun son oyunu barədə də geniş fikir yürütmək çətindir. İlk tur olduğundan hər iki komanda ehtiyatlı oyuna üstünlük verib, mövsümün ilk matçında məğlub olmaq istəmirdi. Bu üzdən 90 dəqiqə "sülh"lə başa çatdı.
Qeyd edək ki, ilk turda keçirilməli olan "Sabah" – Qarabağ" matçı təxirə salınıb.
