Idman.biz
Avrokuboklarda qeyri-adi hadisə yaşana bilər.
İdman.biz xəbər verir ki, "Çelsi"nin növbəti mövsümdə avrokubokların hansı turnirinə qatılması ilə bağlı seçim etmək ehtimalı yaranıb.
Konfrans Liqasının finalına yüksələn İngiltərə klubu həlledici görüşdə "Betis"lə üz-üzə gələcək. London təmsilçisi bu matçda qalib gəlsə, Avropa Liqasının əsas mərhələsinə vəsiqə qazanacaq.
"Göylər" həm də Premyer Liqada mövsümü "beşlik"də bitirməyə yaxındır. Əgər londonlular bunu bacarsalar, Çempionlar Liqasına vəsiqə əldə edəcək.
UEFA qaydalarına əsasən, eyni klub iki turnirə vəsiqə qazanırsa, hansında oynamağı özü seçəcək. Amma bunun üçün "Çelsi" hər iki vəzifənin öhdəsindən gəlməlidir.
İngiltərə təmsilçisinin Çempionlar Liqasını seçəcəyi şübhə doğurmur. Çünki onlar bu turnirə də qatılsalar, əsas mərhələdən başlayacaqlar.
Bu qayda yalnız zəif liqaların təmsilçilərinin fərqli seçim etməsi ilə nəticələnə bilər. Həmin komandalar Çempionlar Liqasının təsnifat mərhələlərində mübarizəni erkən dayandırmaqdan ehtiyat edərək birbaşa Avropa Liqasının Liqa mərhələsinə üstünlük verə bilər.
Qeyd edək ki, Konfrans Liqasının finalı mayın 28-də keçiriləcək.
İdman.biz
