Idman.biz
Londonun "Çelsi" klubu Çempionlar Liqasında "Qarabağ"la oyuna heyətlə bağlı nikbin xəbərlər fonunda hazırlaşır.
İdman.Biz britaniyanın aparıcı KİV-lərinə istinadla xəbər verir ki, bir neçə vacib futbolçu zədədən sonra bərpa prosesini başa çatdırır və baş məşqçi Enzo Mareska onların səfər qarşılaşmasında iştirakına ümid edir.
Komandanın kapitanı Ris Ceyms artıq oyuna tam hazırdır. Mareskanın sözlərinə görə, müdafiəçi özünü yaxşı hiss edir və zədədən sonra tam yüklənməyə hazırdır. Hücumçu Liam Delap da ümumi məşqlərə qayıdıb və gözlənilir ki, Bakıya gedəcək heyətə daxil ediləcək. Enzo Fernandesin də heyətə qayıtmağa yaxındır – yarımmüdafiəçi diz iltihabından sonra artıq məşqlərə başlayıb və tibbi heyət onun "Qarabağ"la oyuna qədər hazır olacağına əmindir.
Bundan əlavə, müdafiəçi Tosin Adarabio baldır əzələsindəki yüngül problem səbəbindən bir müddət oynamamışdı, lakin indi bərpa olunub və matçda iştirak etməyə hazırdır. Yaxınlarda beyin silkələnməsindən sonra yoxlamadan keçən Vesli Fofana da "Qarabağ"la oyunun iştirak ərizəsinə salına bilər, baxmayaraq ki, onun start heyətində yer alıb-almayacağı hələlik qeyri-müəyyəndir.
Eyni zamanda, "Çelsi" hələ də bəzi zədəlilərin xidmətindən məhrum olacaq. Komanda qasıq nahiyəsindən zədə alan Koul Palmer, əzələ problemi yaşayan Benua Badiaşil, çarpaz bağları qopmuş Levi Kolvill və diz əməliyyatı keçirən Dariu Essuqunun xidmətindən istifadə edə bilməyəcək.
Mareska bildirib ki, 1 noyabrda İngiltərə Premyer Liqasının növbəti turunda "Tottenhem"lə keçiriləcək oyunda komandaya yeni qayıdan futbolçular ehtiyatla meydana buraxılacaq ki, zədənin təkrarlanması riski olmasın. Beləliklə, "Çelsi" Bakıda keçiriləcək qarşılaşmaya gücləndirilmiş heyətlə, lakin start tərkibdə mümkün rotasiya ilə çıxacaq.
"Qarabağ" - "Çelsi" oyunu Çempionlar Liqasının qrup mərhələsinin dördüncü turu çərçivəsində noyabrın 5-də Bakıda, Tofiq Bəhramov adına Respublika stadionunda keçiriləcək.
Teymur Tuşiyev
