Idman.biz
Xəbər verildiyi kimi, İngiltərə Futbol Assosiasiyası "Çelsi"yə qarşı agentlərə, vasitəçilərə ödənişlər və üçüncü tərəflərin investisiyaları ilə bağlı 74 ittiham irəli sürüb.
İdman.biz-in məlumatına görə, pozuntular klubun Roman Abramoviçə məxsus olduğu dövrlə bağlıdır. Lakin vəziyyətin ciddiliyinə baxmayaraq, xalların silinməsi şəklində ən ağır cəzanın tətbiq olunma ehtimalı azdır.
"Göylər" özləri Futbol Assosiasiyası, Premyer Liqa və UEFA ilə əlaqə saxlayıb, 2012-2019-cu illərdə natamam maliyyə məlumatlarının təqdim edildiyini bildiriblər. Klubun yeni sahibi Todd Boeli və "Clearlake Capital" fondu 2022-ci ildən istintaqla fəal əməkdaşlıq edir ki, bu da yüngülləşdirici hal hesab olunur.
Mütəxəssislər qeyd edirlər ki, belə hallarda pozuntunun idman üstünlüyünə çevrilib-çevrilməməsi nəzərə alınır. Maliyyə məsləhətçisi Stefan Borson vurğulayıb ki, fəal əməkdaşlıq və günahı etiraf etmək sanksiyaları 30-40% azalda bilər.
Daha öncə "Nottingem Forest" və "Everton" maliyyə pozuntularına görə xalları silinməklə cəzalandırılıblar. "Çelsi" sentyabrın 19-dək iddialara rəsmi şəkildə cavab verməlidir.
İdman.biz
