Idman.biz
Bir neçə gün əvvəl mətbuatda klubun baş məşqçisinin vəzifəsindən azad edilməsi barədə yayılan xəbərin saxta olduğu üzə çıxandan sonra, dünəndən etibarən bəzi saytlar "Cəbrayıl"ın maliyyə problemləri olduğu və futbolçuların avqust ayından bəri maaş və mükafat almadığı barədə yazırlar.
İdman.Biz redaksiyası klub prezidenti Şahin Məmmədovla danışaraq bu barədə şərh verməsini istəyib:
"Anladığım qədəri ilə bəzi jurnalistlər və saytlar, birinci liqadan başqa klub haqqında yazmaq üçün mövzu tapa bilmirlər. Bəli, komandamız hazırda çox uğurlu çıxış etmir və mən bundan məmnun deyiləm, amma bütün futbolçular maaşlarını vaxtında alır.
Mükafatlarla bağlı isə qərar tamamilə klub rəhbərliyinin işidir. Verək, verməyək - bunu yalnız biz müəyyən edirik. İstəsək əlavə mükafat verərik, istəməsək vermərik, onlar isə maaşlarını normal şəkildə alırlar. Heç bir klubda futbolçulara mükafat öhdəliyi yoxdur və ola da bilməz. Əvvəlcə futbolçular stabil və keyfiyyətli oyun göstərsinlər ki, biz də onları mükafatlandıraq", - Ş.Məmmədov bildirib.
Vüqar Vüqarlı
