Report.az
"Səbail" Mirabdulla Abbasova görə maddi baxımdan o qədər də ziyana düşməyəcək.
Bunu "Report"a açıqlamasında "Səbail"in baş məşqçisi Cavid Hüseynov deyib.
O, uzun müddətdir futbol oynamayan Mirabdulla Abbasovla anlaşdıqlarını bildirib:
"Mirabdulla komandamıza qoşulub. Bilirsiniz ki, xeyli müddətdir futbolsuz qalmışdı. Müraciət edərək yenidən başlamaq istədiyini vurğuladı. "Səbail" Mirabdulla Abbasova görə maddi baxımdan o qədər də ziyana düşməyəcək. Futbolçuya ikinci şans vermişik. Bildiyimə görə, 2 ilə yaxındır futbol oynamırdı. Onsuz da komandamızda futbolçu çatışmazlığı var. 3 futbolçumuz əməliyyat olunub. Çox transfer də edə bilmirik. Mirabdulla məşqlərdə canla-başla çalışır. Daha iki oyunçu ilə razılıq əldə etmişik. Onlardan biri hücumçu, digəri stopperdir. İndi adlarını çəkməyim düzgün deyil. Ümumilikdə 5-6 futbolçu istəyərdim. Bunun nə dərəcədə mümkün olacağını deyə bilmərəm".
C.Hüseynov daha iki futbolçu ilə anlaşma əldə olunduğunu vurğulayıb:
"Dəyişiklik imkanımıza bağlı olan prosesdir. O qədər də böyük imkanımızın olmadığı məlumdur. Bəzi mövqeləri gücləndirmək istəyirik. İki oyunçu ilə, demək olar ki, razılaşmışıq. Yaxın günlərdə bu barədə açıqlama veriləcək. Daha bir neçə futbolçu transfer etməyi planlaşdırmışıq".
Mütəxəssis komandanı sonuncu yerdən xilas etmək planlarından danışıb:
"İki dövrədən sonra, əlbəttə ki, turnir cədvəlində bizim üçün xoş olmayan sonuncu yerdəyik. Lakin rəqiblərimiz çox da öndə deyillər. Çalışacağıq qış fasiləsindən yaxşı istifadə edək və növbəti oyunlarda qələbələr qazanaraq sonuncu yerdən qurtulaq".
O, qış fasiləsindən sonrakı oyunlardan çox şey asılı olacağını da bildirib:
"Çalşacağıq ki, maksimum dərəcədə irəliləyək. Bizim üçün fasilədən sonrakı ilk oyunlar çox önəmlidir. Səfərdə "Sumqayıt"la, daha sonra "Kəpəz"lə görüşəcəyik. Bu matçlardan çox şey asılı olacaq".
Qeyd edək ki, "Səbail" Misli Premyer Liqasında iki dövrədən sonra turnir cədvəlində 9 xalla sonuncu - 10-cu pillədə qərarlaşaq.
