Idman.biz
"Şkendiya" çox xarakterli rəqibdir. Ötən qarşılaşmada da pis təsir bağışlamadılar, son saniyəyə qədər mübarizə apardılar. Lakin "Qarabağ"ın təcrübəsi bu baxımdan ön plana çıxırdı. Hazırda da psixoloji üstünlük Ağdam təmsilçisindədir. İnanıram ki, Bakıda da ssenari dəyişməyəcək və yenə hücum edən tərəf olacaqlar".
İdman.biz xəbər verir ki, bu sözləri Futbolinfo.az-a açıqlamasında Cavid Hüseynov deyib.
Gənc mütəxəssis Çempionlar Liqasının III təsnifat mərhələsinin cavab oyunu ilə bağlı danışarkən "Qarabağ"ın səfərdə 1:0 hesablı qələbəsini çox sərfəli nəticə adlandırıb: "İnanmıram ki, taktiki baxımdan hansısa dəyişiklik edilsin. Hər zaman gördüyümüz oyun planı ilə meydana çıxacaqlar. Ola bilər ki, ilk oyundan sonra rəqibi daha yaxşı analiz edib, müəyyən detallara toxunsunlar. Səfərdə hücum xəttimiz pis təsir bağışlamadı, bir neçə dəfə qol imkanı yarandı. Düzdür, Nərimanın qaçırdığı epizodlar oldu, amma hazırda pis vəziyyətdə deyil".
O, "Sabah"ın Konfrans Liqasında "Levski" ilə matçına da toxunub: "Səfərdə güclü rəqibə qarşı çox yaxşı mübarizə apardılar. Oyun boyunca çəkinmədiklərini göstərdilər. Taktiki baxımdan dəyişiklik edilərək beşli müdafiə xəttinə keçilmişdi. Bu qərar yəqin ki, rəqibi analiz etdikdən sonra verilib. Son saniyələrdə qol buraxmaq çox üzücü oldu. İstərdik ki, qol buraxmadan Bakıda daha rahat oynasınlar. Amma problem yoxdur. Sadəcə, ələ düşən qol şanslarından maksimum yararlanmaq lazımdır. Taktikanı isə baş məşqçi ən yaxşı bilir. Ümid edək ki, çətin rəqib üzərində qələbə qazana bilərlər".
Hüseynov "Araz-Naxçıvan"ın çıxışını da dəyərləndirib: "Bu mövsüm heyətə çox yaxşı futbolçular cəlb olunub. Hər üç oyunda da bunun şahidi olduq. "Aris" kimi komandanı Konfrans Liqasından uzaqlaşdırdılar. Amma təəssüf ki, "Omoniya"ya qarşı eyni nəticəni əldə edə bilmədik. Rəqib çox strukturlu komandadır və taktiki planda güclüdür. Müdafiədə də, hücumda da üstünlükləri var. Evdə 0:4 hesablı məğlubiyyətdən sonra səfərdə işimiz çox çətin olacaq. Lakin bütün bunlara baxmayaraq, hər üç komandamıza uğurlar arzulayıram".
İdman.biz
