Çarles Boli "Araz-Naxçıvan"a keçidi, Koffi və Zubirlə söhbətləri haqqında danışdı - MÜSAHİBƏ

"Araz-Naxçıvan"ın yeni transferi Çarles Bolinin Futbolxeber.az saytına müsahibəsi

- Artıq bir neçə gündür "Araz-Naxçıvan"a qoşulmusunuz. İlkin təəssüratlarınız necədir?

- İlkin təəssüratlarım əladır. Burada olmaqdan məmnunam. Məni "Araz-Naxçıvan"da çox yaxşı qarşıladılar. İstər oyunçular, istər məşqçilər, istərsə də texniki heyət. Komandada gözəl atmosfer var. Bütün bunlar məni sevindirir.

- Şablon da olsa, soruşmalıyıq, daha əvvəl Azərbaycan, yaxud futbolumuz barədə hər hansı məlumatınız var idi?

- Bura gəlməmişdən öncə Azərbaycan haqda müəyyən məlumatım var idi. Amma canlı görmək tam başqadır. Bir neçə gündür Bakıda olsam da, şəhəri çox bəyəndim. Düzdür, hələlik çox gəzmək imkanım olmayıb. Lakin görünən odur ki, paytaxt çox gözəldir. Futbol tərəfindən yanaşdıqda isə burada çıxış edən bəzi tanışlarımdan müəyyən məlumatlar əldə etmişdim.

- Kimlərdən?

- "Neftçi"dən Ervin Koffi, "Qarabağ"dan Abdullah Zubiri tanıyıram. Bura gəlməmişdən öncə onlarla söhbətim oldu. Həm Koffi, həm də Zubir "Araz-Naxçıvan" haqda müsbət fikirlər səsləndirdilər.

- Qarşıda "Araz-Naxçıvan"ı UEFA Konfrans Liqası gözləyir. "Aris"lə oyunlarda şansları necə dəyərləndirirsiniz?

- "Aris" yaxşı komandadır. Çox yaxşı heyətləri var. Bununla belə, hazır olmalıyıq. Əlimizdən gələni edəcəyik ki, sevinən tərəf biz olaq. 20-25 gün vaxtımız var. İnanıram ki, Yunanıstan klubuna qarşı layiqli çıxış edəcəyik.

- İlk matçı evdə keçirmək "Araz-Naxçıvan"ın lehinədir, yoxsa əleyhinə?

- Ciddi bir fərqi yoxdur. Mərhələ adlamaq istəyiriksə, hər iki matçda yaxşı, diqqətli oynamalı, mümkün qədər az səhvə yol verməli və qalib gəlmək üçün əlimizdən gələni etməliyik.

- "Lans"ın yetirməsi olduğunuzu nəzərə alsaq, "Land of fire Azerbaijan" ifadəsi sizə nəsə xatırladır?

- Əlbəttə, "Land of fire Azerbaijan" barədə məlumatım var. Bu, əla layihə idi. Hafiz Məmmədovu da, "Bakı"nı da tanıyıram. Həmin vaxt mən "Lans"ın akademiyasında idim.

- Əməkdaşlıq çərçivəsində "Bakı"nın yetirmələri də bir müddət "Lans"ın akademiyasında hazırlıq keçmişdilər. Həmin gənclərdən bəziləri bu gün Azərbaycan millisində forma geyirlər. Adlarını xatırladıqlarınız var?

- Bəli, yadımdadır, o zaman "Bakı"nın bir neçə gənc futbolçusu da "Lans"ın akademiyasında oldu. Təəssüf ki, indi onların adlarını xatırlamıram.

İdman.biz