Canni De Byazi: İki azərbaycanlı oyunçu haqqında dostuma danışmışdım

Azərbaycan millisinin sabiq baş məşqçisi Canni De Byazi Sportal.az saytına müsahibə verib. 2020-2023-cü illərdə yığma komandamızı çalışdırmış italiyalı mütəxəssis ölkəmizi tərk etdikdən sonra işsizdir. 69 yaşlı məşqçi həm milli komandamızın indiki durumundan bəhs edib. Sport24.az müsahibəni sizə təqdim edir.

- Azərbaycan milli komandası kənardan necə görünür? DÇ-2026-nın seçmə mərhələsinin son iki matçında Azərbaycanın Fransa və Ukraynaya qarşı oyununu izlədiniz?

- Bəli, əlbəttə ki, hər iki görüşü də izlədim. Kağız üzərində həm Fransa, həm də Ukraynaya qarşı görüşlər ağır görünürdü. Amma məncə, Azərbaycan millisi hər iki matçı yaxşı səviyyədə keçirdi. Meydanda layiqli mübarizə apardılar.

- Ayxan Abbasov hazırda milli komandanın baş məşqçisidir və əksər insanlar bu təyinatı müsbət qarşılayır. Üç matçda da ortaya pozitiv iş ortaya qoya bilib. Bəs, sizin fikrinizcə, o, milliyə uğur qazandıra biləcək?

- Mən Ayxan Abbasovu "Sumqayıt"dakı dövründən çox yaxşı tanıyıram. O, gəncdir və özünü təsdiqləmək üçün çox istəklidir. Bu da çox yaxşıdır. Lakin təcrübəsizliyinin ona nə qədər təsir edəcəyini bilmirəm. Amma istənilən halda, Azərbaycan millisinə uğurlar arzulayıram.

- Ümumiyyətlə, Azərbaycan millisinin əsas problemi sizcə nədədir? Həm də, Azərbaycan futbolunun...

- Bu, aydınlaşdırmağı çətin olan məqamdır. Şübhəsiz ki, Azərbaycan Premyer Liqası azərbaycanlı oyunçuların inkişafına töhfə vermir. Mən Azərbaycana yeni gələndə demişdim ki, biz futbolçuların mentaliteti, daha sonra isə keyfiyyətləri üzərində işləməliyik! Deyə bilərəm ki, üç il ərzində bu yöndə inanılmaz nəticələr və diqqətəlayiq artım gördüm.

- Yəqin ki, bilirsiz, Fernandu Santuş millidəki dönəmində qələbə qazana bilmədi. DÇ-2026-nın seçmə mərhələsində Reykyavikdə İslandiyaya 0:5 hesabı ilə uduzduqdan sonra isə AFFA onu istefaya göndərdi...

- Portuqaliya kimi bir reallıqdan Azərbaycan millisinə keçmək əlbəttə ki, asan deyil. Fernandu Santuş təcrübəli məşqçidir. Yəqin ki, yeni vəziyyətə uyğunlaşa bilmədi.

- Bəs, siz Azərbaycan millisinin baş məşqçi postunda qala bilərdiniz? Ayrılığınıza səbəb nə oldu? 

- Əlbəttə ki, Azərbaycan milli komandasının baş məşqçi postunda qalmaq imkanım var idi, amma özüm istefa verdim.

- Sizcə, milli indi daha pis durumdadır?

- Düşünürəm ki, indi Azərbaycan millisi üçün heç də ən pis vaxtlar deyil. Amma düşünürəm ki, gənc oyunçularla gələcəyi qurmaq mümkündür.

- Azərbaycanlı futbolçulardan kimisə İtaliya klublarına təklif etmişdiniz? Hazırda azərbaycanlı futbolçulardan kiminlə danışırsız, münasibətiniz qalan var?

- A seriyası komandasında çalışan dostuma iki azərbaycanlı oyunçu haqqında danışmışdım. Amma kimlər olduğunu deməyəcəm. Azərbaycandan ayrıldıqdan bəri millidəki futbolçuların heç biri ilə əlaqə saxlamamışam ki, onları narahat etməyim. Məşqçi yoldaşlarıma da çox hörmətim var. Görüşənə qədər. Forza Azərbaycan!