Cahangir Həsənzadə: “Lixtenşteynlə 3 xal qazanmaq üçün hazırıq”

"Millimizin Lixtenşteynlə səfər oyunundan yalnız qələbə gözləyirik. Fikrimcə, komandamız bu qarşılaşmada üç xal qazanmaq üçün bütün imkanlara malikdir". 

Bunu Sport24.az-a açıqlamasında AFFA-nın sabiq Texniki direktoru Cahangir Həsənzadə bildirib.

47 yaşlı mütəxəssis UEFA Millətlər Liqası çərçivəsində keçiriləcək Lixtenşteyn – Azərbaycan qarşılaşması ilə bağlı gözləntilərini bölüşüb:

"Düzdür, yığmamızın Lixtenşteynlə ev görüşündə əldə etdiyi nəticə heç də ürəkaçan olmamışdı. Ancaq düşünürəm ki, futbolçular həmin matçdan lazımi nəticə çıxarıb, yol verdikləri səhvləri təhlil ediblər. İnanıram ki, millimiz səfər qarşılaşmasına daha yaxşı hazırlaşacaq. Əsas odur ki, futbolçular sona qədər mübarizə aparsınlar, verilən tapşırıqları düzgün yerinə yetirsinlər və qol imkanlarından maksimum yararlansınlar. Belə olan halda həm üç xal əldə edə, həm də qrup liderliyinə yüksələ bilərik. Futbolda hər cür nəticə qeydə alına bilər. Bunu hamımız yaxşı bilirik. Lakin Lixtenşteynlə qarşılaşmadan xal itkisi və ya məğlubiyyət barədə düşünmək istəmirəm. Millimizdən gözləntimiz böyükdür. Komandamızın potensialına inanırıq və səfərdən qələbə ilə dönəcəyinə ümid edirik".

Xatırladaq ki, noyabrın 13-də Vaduts şəhərində keçiriləcək Lixtenşteyn - Azərbaycan oyunu Bakı vaxtı ilə saat 23:45-də start götürəcək.