Sport24.az
Artıq neçə müddətdi futbol camiəsində AFFA-nın texniki direktoru Cahangir Həsənzadənin, U-15-in çalışdırıcısı Aqil Nəbiyevin, U-17-nin baş məşqçisi İlham Yadullayevin və U-18-in "sükanı arxasında" olan Füzuli Məmmədovun postlarından gedəcəyi barədə söz-söhbətlər dolaşır. İcraiyyə Komitəsinin yanvarda keçiriləcəyi iclasında müxtəlif yaş qrupu üzrə yığmaların uğursuz çıxışı səbəbindən adını qeyd etdiklərimizlə başa çatan müqavilənin yenilənməyicəyi bildirilir. Ancaq hər şey əksinə də ola bilər.
Sport24.az-a ötürülən məlumata görə, Cahangir Həsənzadə və onun himayə etdiyi məşqçilər Elxan Məmmədovun onları qoruyacağına arxayındılar. Hər kəsə bəllidi ki, AFFA-nın hazırkı texniki direktoru Məmmədovun kadrıdı və vəzifəyə Elxan bəyin quruma rəhbərlik etdiyi dönəmdə gəlib. Kreslosunun laxladığını görən Həsənzadə hazırda FİFA-da mühüm vəzifədə çalışan Elxan bəyə ağız açaraq onu və "komandasını" qorumağı xahiş edib.
FIFA-ya Üzv Assosiasiyaların direktoru da AFFA-dakı "kadrlarına" maksimum dərəcədə dəstək olacağını, "çətirini" onların üstündən çəkməyəcəyini bildirib.
Məmmədovun mesajından sonra Həsənzadə və "komandası" kluarlarda yanvarda yeni müqaviləyə imza atacaqlarını söyləyirlər.
