Cahangir Həsənzadə: “60 faiz üstünlük “Zirə”dədir”

"Şerif" sıradan bir komanda deyil".

Bunu "İdman Bizdə"nin qonağı olan Azərbaycan millisinin sabiq futbolçusu Cahangir Həsənzadə deyib.

44 yaşlı veteran qapıçı "Zirə"nin Avropa Liqasının I təsnifat mərhələsində "Şerif"lə matçlarını şanslarını dəyərləndirib. O bildirib ki, bu gün keçiriləcək ilk görüşdə tərəflər ehtiyatlı futbola üstünlük verəcəklər: "Moldovadakı görüşdə alışdığımız kimi ev sahibi komanda hücumda olacaq. Qonaqlar müdafiə olunacaq və əks-hücumlara bel bağlayacaqlar. "Zirə" məhz buna uyğun oyun üslubu ilə çıxış edir. Qısa müddətdə bunun dəyişəcəyini düşünmürəm. Oyun səfərdə olduğu üçün təmsilçimiz daha çox müdafiəyə qapanacaq. Onlar sürətli əks-hücumlara, ya da standart vəziyyətlərə bel bağlamalı olacaqlar. İlk oyundan sonra 2-ci matçda intriqa qorunacaq. İnanmıram ki, "Şerif" Tiraspolda böyük hesablı qələbə qazansın. "Zirə"nin birinci oyunda cütün taleyini həll etməsini istəyirəm. Amma bu da real görünmür. Nəzərə alaq ki, "Zirə" Premyer Liqada belə az qol vuran və ən az qol buraxan komandalardandır. İndi yeni hücumçu da alıblar. Bəlkə də onun ayağı komandasına düşərli olar. Düşünürəm ki, 1-ci oyundan sonra matçın hərarəti qalacaq".

Həsənzadə cütdə "Zirə"nin favorit olduğunu düşünür: "Əminliklə deyə bilərəm ki, 60 faiz üstünlüyü "Zirə"də görürəm. Burda həm də "Şerif"in fundamental olaraq yenilənməsi qısa müddətdə yaxşı nəticə verməsinə dəlalət etmir. Onlara da müəyyən vaxt lazım olacaq ki, bəlkə növbəti mövsümdə istədiyi futbolu nümayiş etdirib, yaxşı nəticələr əldə etsin. Bu, "Zirə"nin "dəyirmanı"na su tökəcək".

Qeyd edək ki, "Şerif" – "Zirə" matçı bu gün saat 21:00-da start götürəcək.

Emin Ağa
İdman.biz