Sport24.az
Misli Premyer Liqasının XXXI turunda keçirilən "Zirə" – "Sumqayıt" (3:1) matçından sonra meydan sahibi komandanın baş məşqçisi Rəşad Sadıqov jurnalistlərin suallarını cavablandırdı. Sport24.az xəbər verir ki, mütəxəssis əvvəlcə oyunla bağlı fikirlərini bölüşdü:
– Futbolçularımı təbrik edirəm. Olduqca vacib 3 xal qazandıq. İlk hissə bizim üçün daha rahat keçirdi. Amma istər fasilədə, istərsə də çempionat zamanı "Sumqayıt"ın rəngarəng və baxımlı futbol oynadığını xatırladırdıq. Bunda Vaqif Cavadovun böyük rolu var. Maraqlı işlər görür. Xüsusən də hücum fazasında diqqət cəlb edən həmlələr edir. Üstünlüyümüzə baxmayaraq ikinci hissəsin əvvəlində qol buraxdıq və ondan sonra komanda üzərində müəyyən stres yarandı. "Sumqayıt" da daha böyük qüvvə ilə irəli atıldı. Biz isə məcburiyyətdən son 15-20 dəqiqədə daha çox müdafiəyəmeylli dəyişikliklər edirdik. Rəqib də həmin zaman hücumlar edirdi. Onlar da hesabı bərabərləşdirə bilərdilər. Şükürlər olsun ki, 3-cü qolu biz vurduq. "Sumqayıt"a uğurlar arzulayıram.
– Qalib gəlməsəydiz "Qarabağ" rəsmən çempion olacaqdı. İstənilən halda bu durum sizi daha çox motivasiya edirdi?
– Xeyr, açığı bu barədə heç düşünmürdük. "Qarabağ" artıq çempiondur, sadəcə onu formallaşdırmaq qalıb. Sadəcə özümüzü düşünürük. Avrokuboklara düşmək üçün imkan dərəcəsində yüksək yerlər uğrunda çalışırıq. Hazırda yalnız bunu düşünürük. Hətta ikinci qolu buraxsaydıq da futbolçularıma qəzəblənməyəcəkdim. Sona doğru futbolçularda stres olur. Hansı klub bunun öhdəsindən gələcəksə, o da daha yaxşı yerlərdə qərarlaşacaq.
– 16 il öncə formasınl geydiyiniz "Kocaelispor" Türkiyə Super Liqasına vəsiqə qazandı. Bu barədə hislərinizi bölüşə bilərsiz?
– Çox sevindim. O şəhər, o azarkeşlər, o camiə yüksək liqada çıxış etməyə layiqdir. Şəhərdə yeni gözəl stadion da tikilib. Ümumiyyətlə, "Bursaspor"dur, "Kocaelispor"dur hansı ki, bu tip komandalar yüksək liqada oynamağa layiqdirlər. "Kocaelispor"u yaxından izləyəcəm və onlara azarkeşlik edəcəm.
– Ötən tur "Neftçi"ylə oyunda Stefan Akaya qarşı irqçilik şüarları səsləndirildi. Bu oyunda isə Aka tribunada idi. Onun psixoloji durumu necədir?
– Düzü bu haqda məndə ətraflı məlumat yoxdur.
– AFFA İntizam Komitəsi də bu məsələylə bağlı "Neftçi"ni cəzalandırmışdı…
– Bilmirəm. Biz "Neftçi"ylə matçda onu zədəylə bağlı dəyişmək istəyirdik, amma o, davam etmək istədi və zədəsini daha da pisləşdirdi. Artıq 2-3 həftə oyunlarda iştirak edə bilməyəcək. Amma ikinci yarıda göstərdiyi performansa görğ zədələnməsinə dəyərdi. Çünki olduqca vacib qələbə oldu. Aka gözəl qəlbli və gözəl xarakterli bir insandır. Ancaq mən irqçi şüarı eşitməmişəm. Eşitsəydik əgər, bəlkə də şərh etmək olardı. Bəlkə də bir nəfər kimsə deyib. Onu bütün "Neftçi" azarkeşlərinə də bağlamaq düzgün deyil.
– Yeni mövsümdən Premyer Liqada legioner limiti tətbiq edilməyəcək. Bu, sizin yerlilərlə bağlı planlarınıza təsir edəcək?
– Yox, planlarımızı dəyişmir. Rəqabət olacaq. Biz DAK-la avrokubok matçında səfərdə 5 yerli ilə oynamışdıq. Kim güclü olacaqsa, o da oynayacaq. Heyətimizdə yerlilər də olacaq. Dəyərli yerlilərimiz var.
– Danışıq apardığınız futbolçular var?
– Bəli, danışıq apardıqlarımız var. Danışacağımız futbolçular var. Amma çox futbolçu bizimlə davam edəcək.
