Idman.biz
"Leyptsiq" Almaniya Bundesliqasının 22-ci turunu beşinci pillədə başa vurub. Komanda "Volfsburq"la 2:2 hesablı heç-heçə edib.
İdman.Biz xəbər verir ki, ilk hissədə üstün oyun göstərən meydan sahibləri hesabı aça bilməyiblər. Əksinə, fasilədən sonra əks-hücumda qonaqlar önə keçiblər. Mohamed Amoura uzaq küncə dəqiq zərbə ilə fərqlənib.
"Leyptsiq" cavabı tez verib. Brajan Qrudanın ötürməsindən sonra Yan Diomande topu tora göndərib. Lakin bərabərlik uzun sürməyib - Mattias Svanberq yenidən "Volfsburq"u önə çıxarıb.
Son dəqiqələrdə müdafiə səhvindən istifadə edən Qruda cərimə meydançasının kənarından sol ayaqla uzaq küncü nişan alaraq hesabı bərabərləşdirib.
Turun yeganə heç-heçəsi hər iki tərəfi tam qane etməyib. Xüsusilə də ikinci hissənin böyük bölümündə öndə olan "Volfsburq" üçün nəticə üzücü olub. "Leyptsiq" isə geridönüş edərək ən azı bir xalı xilas etməyi bacarıb və xallarını 40-a çatdırıb. 20 xalı olan "Volfsburq" 15-ci pillədədir.
21:18
"Auqsburq" Bundesliqanın 22-ci turunda "Haydenhaym" üzərində 1:0 hesablı qələbə qazanıb.
İdman.Biz xəbər verir ki, oyunun taleyini penalti həll edib. Görüşün 80-ci dəqiqəsində Aleksis Klod-Moris yeganə qolu vurub.
Bu qələbədən sonra xalını 25-ə çatdıran komanda turnir cədvəlində 11-ci pilləyə yüksəlib və növbəti turda səfərdə "Volfsburq"la üz-üzə gələcək. "Haydenhaym" isə 13 xalla sonuncudur.
