Idman.biz
Almaniya Bundestaqının 24-cü turu çərçivəsində keçirilən "Hamburq" - "Leyptsiq" matçı qonaqların 2:1 hesablı qələbəsi ilə başa çatıb.
İdman.Biz xəbər verir ki, oyuna meydan sahibləri daha fəal başlayıblar. 22-ci dəqiqədə Fabiu Vieyra "Hamburq"u hesabda irəli çıxarıb. Lakin "buğalar" tezliklə tarazlığı bərpa edə biliblər. 36-cı dəqiqədə Romulu rəqib qapısına yol taparaq hesabı bərabərləşdirib.
İkinci hissənin əvvəlində - 50-ci dəqiqədə Yan Diomand vurduğu qolla "Leyptsiq"in geri dönüşünü tamamlayıb. Qalan vaxt ərzində "Hamburq"un cəhdlərinə baxmayaraq, hesab dəyişməyib.
Bu qələbədən sonra xallarını 44-ə çatdıran "Leyptsiq" turnir cədvəlinin beşinci pilləsində qərarlaşıb. 26 xalı olan "Hamburq" isə 11-ci sırada yer alıb.
Növbəti turda, martın 7-də "Hamburq" səfərdə "Volfsburq"la qarşılaşacaq. "Leyptsiq" isə həmin gün öz meydanında "Auqsburq"u qəbul edəcək.
23:30
Almaniya Bundestaqının 24-cü turu çərçivəsində keçirilən "Ayntraxt" - "Frayburq" matçı Frankfurt təmsilçisinin 2:0 hesablı qələbəsi ilə başa çatıb. Gərgin keçən qarşılaşmanın taleyi oyunun son yarım saatında həll olunub.
İdman.Biz xəbər verir ki, hesab 64-cü dəqiqədə açılıb. Meydan sahiblərinin hücumçusu Fares Şaibi rəqib qapısına yol taparaq komandasını önə çıxarıb. "Ayntraxt"ın üstünlüyünü isə 81-ci dəqiqədə yarımmüdafiəçi Jan-Matteo Baoyya təmin edib.
Bu qələbədən sonra xallarını 34-ə çatdıran "Ayntraxt" turnir cədvəlinin yeddinci pilləsinə yüksəlib. 33 xalı olan "Frayburq" isə səkkizinci sıraya geriləyib.
21:21
Almaniya Bundestaqının 24-cü turu çərçivəsində "Ştutqart" futbol komandası "Volfsburq"u böyükhesablı məğlubiyyətlə yola salıb. Görüşün taleyi elə ilk 45 dəqiqədə vurulan qollarla həll olunub.
İdman.Biz xəbər verir ki, hesab 21-ci dəqiqədə açılıb. Ermedin Demiroviçin ötürməsindən sonra Denis Undav dəqiq zərbə ilə komandasını önə çıxarıb - 1:0. Az keçmədən Kris Fürixin yaratdığı fürsəti Ceymi Levelinq qola çevirərək fərqi artırıb.
Birinci hissənin sonuna yaxın "Volfsburq"un müdafiəçisi Morits Yents ötürməni kəssə də, Levelinq dərhal topa sahib çıxaraq dublunu rəsmiləşdirib - 3:0. Qonaqların heyətində Lovro Mayer rəqib müdafiəçinin kobud səhvindən sonra fərqlənmək şansı qazansa da, zərbəsi qapıdan yan keçib. Matçda son nöqtəni 90-cı dəqiqədə Nikolas Nartey qoyub - 4:0.
Bu qələbədən sonra "Ştutqart" (46) "Hoffenhaym"la turnir cədvəlində üçüncü pilləni bölüşür. "Volfsburq" (20) isə autsayderlər sırasında - sondan ikinci yerdə qərarlaşıb.
