Bu gün "Mehdi Hüseynzadə"də ajiotaj olacaq?

Premyer Liqanın XVI turunun mərkəzi qarşılaşması dünən keçirilən "Sabah" - "Qarabağ" matçı (1:1) hesab olunsa da, heç şübhəsiz ki, "prinsipial oyun" statusunu "Sumqayıt" - "Neftçi" görüşünə şamil etmək olar.

Bu gün keçiriləcək matça rəng qatan və onu prinsipial edən əsas məqam kimi Samir Abasov amilini qeyd lazımdı. Mövsümə "kimyaçılar"ın "sükanı arxasında" başlayan 46 yaşlı mütəxəssis hazırda "ağ-qaralar"ın texniki zonasında əsas söz sahibidi. Abasov hər açıqlamasında Sumqayıta bağlı olduğunu, bu şəhərinin sakini kimi klubun hər uğuruna sevindiyini bildirir. Ancaq bu gün realllıq tam başqadı. Abasov hər nə qədər Sumqayıta bağlı olsa da, hazırda əsas istəyi axşam keçiriləcək görüşdə "Neftçi"nin 3 xal qazanmasıdı. Turnir cədvəli, komandasının durumu bunu tələb edir. "Neftçi" bu tur "Mehdi Hüseynzadə"dən qalib ayrılsa, vəziyyətini bir qədər yaxşılaşdıra, cədvəldə "kimyaçılar"ı qabaqlaya bilər. Odur ki, Samir bəy və komandası üçün "sevgi" bu gün arxa pland olacaq.

İkinci dövrədən "kimyaçılar"ın baş məşqçisi təyin olunan Vaqif Cavadov gənc və iddialıdı. Cavadov "müvəqqəti baş məşqçi" yarlıkını üzərindən götürmək üçün alışıb-yanır.  Komanda onun rəhbərliyi altına çıxdığı 6 oyundan 3-də qələbə qazanıbsa, passivində eyni sayda məğlubiyyət də var. "Neftçi" üzərində qələbə rəhbərliyin və azarkeşlərin ona etimadını artıra bilər.

Son illərdə bu komandalar arasında baş tutan görüşlərdə aşkar favoritin kim olduğunu söyləmək çətindi. Bəlkə də kağız üzərində bakılılar daha üstün görünür. Abasov sabiq komandasının zəif və üstün cəhətlərinə daha yaxından bələddi. Ancaq meydan sahibləri istək və əzmkarlıq baxımından adlı-sanlı, ancaq hazırda heç də yaxşı günlərini yaşamayan rəqibindən geri qalmır. İnam və istək isə uğurun yarısıdı.

Sonda azarkeşlər barədə... "Neftçi" və "Qarabağ"ın Sumqayıta hər gəlişi ajiotaja səbəb olur. Təsadüfi deyil ki, ötən mövsümün III dövrəsinə təsadüf edən, "Mehdi Hüseynzadə"nin açılışında bu komandaların oyununda mövsümün azarkeş rekordu qırılmışdı. İnanaq və ümid edək ki, bu dəfə də eyni hala şahidlik edəcəyik. Hər iki komandanın azarkeşləri sevimlilərini yalqız buraxmayacaqlar. Necə deyərlər, futbol qol və azarkeşlərlə gözəldi.