Idman.biz
Ağdamın "Qarabağ" klubu İngiltərə Premyer Liqasının nəhəngi "Çelsi"ni cəzalandırmaq gücünə malikdir - baxmayaraq ki, komandanın büdcəsi Britaniya standartları ilə müqayisədə xeyli kiçikdir.
İdman.Biz xəbər verir ki, bu fikirləri "Yahoo Sports" nəşrinin jurnalisti Nizar Kinsella Bakıda hazırladığı reportajda səsləndirib.
Kinsella qeyd edib ki, "Qarabağ" - "Çelsi" qarşılaşması büdcəsi təxminən 22 milyon funt olan klubla Premyer Liqa nəhənginin dueli olacaq. Lakin Azərbaycan çempionu rəqibin işini ciddi şəkildə çətinləşdirməyə qadirdir.
Müəllifin sözlərinə görə, "Qarabağ" turnirdə inamla irəliləyir, Avrokuboklarda ardıcıl iki ev qələbəsi seriyasını rəsmiləşdirməyə çalışır və artıq səkkiz il əvvəlki Çempionlar Liqasındakı debüt mövsümündən sonra ona yuxarıdan aşağı baxılmır. O, komandanın yetkinliyini və təzyiqə cavab vermək bacarığını vurğulayır.
"Bu, artıq 2017-ci ildə üzərində gülünən komanda deyil. Qurban Qurbanovun komandası böyüyüb, Avropanı təəccübləndirib və yetkin Avropa təmsilçisi kimi oynayır", - deyə Kinsella vurğulayıb.
Jurnalist xüsusilə Qurban Qurbanovun rəhbərliyi altında layihənin qeyri-adi sabitliyini və Azərbaycan çempionunun rəqabətqabiliyyətini önə çəkib. O, "Qarabağ"ın Lissabonda "Benfika" üzərində qazandığı 3:2 hesablı qələbəni və "Atletik"lə (1:3) layiqli oyununu xatırladaraq, bunların komandanın sürətli hücum və rəqibi cəzalandırmaq bacarığını sübut etdiyini qeyd edib.
"Bu, dözümlü və meydanın hər hissəsində cavab verməyi bacaran komandadır. Artıq Avropada onun xarakterinə təəccüblənmirlər", – deyə Kinselə bildirib.
O, həmçinin komandanın intizamını, sürətli başlanğıclarını və vertikal oyun üslubunu qeyd edib. Jurnalistin diqqət mərkəzində erkən qollar vuran Leandro Andrade, dinamik cinah oyunçuları, Abdella Zubir, müdafiədə etibarlı çıxış edən Kevin Medina və qapıda inamlı oyun sərgiləyən Mateuş Kohalski dayanır. Müəllif vurğulayıb ki, heyət ağıllı və məqsədyönlü şəkildə formalaşdırılıb, aşağı büdcə isə əksinə, bu təsiri daha da gücləndirir.
"Komandanın ümumi dəyəri təxminən 22-25 milyon avrodur. Bu, təvazökar layihədir, lakin strukturu və sabitliyi sayəsində varlı klublarla bərabər mübarizə aparır", - deyə jurnalist qeyd edib.
Kinsella eyni zamanda "Çelsi"nin durumunu təhlil edərək, komandanın uzun səfər, London vaxtı ilə rejimi qorumaq cəhdi və Enzo Mareskanın heyət rotasiyasına ehtiyacına diqqət çəkib. Onun fikrincə, londonlular ciddi hazırlaşmalı və arxayınlığa yol verməməlidirlər:
"Bu, "Çelsi"nin nə qədər gümrah olduğunun sınağıdır. Əgər onlar oyunun tempi və ilk dəqiqələrdə "Qarbağa"ı cəzalandıra bilməsələr, Ağdam klubu "Çelsi"nin başını ağrıtmağa qadirdir".
Sonda britaniyalı jurnalist etiraf edib ki, "Çelsi"nin oyun səviyyəsi və heyət dərinliyi obyektiv olaraq daha yüksəkdir. Bununla belə, "Qarabağ"ın oyun üslubu, ab-havası və strukturlaşdırılmış hazırlığı bu fərqi müəyyən dərəcədə azaldır və qarşıdakı oyunu gözləniləndən xeyli az birtərəfli edir.
Xatırladaq ki, "Qarabağ" - "Çelsi" oyunu bu gün Tofiq Bəhramov adına Respublika Stadionunda keçiriləcək və Bakı vaxtı ilə saat 21:45-də başlayacaq. Ağdam və London təmsilçiləri altı xal toplayıblar və Çempionlar Liqasının turnir cədvəlində müvafiq olaraq 13-cü və 11-ci pillələrdə qərarlaşıblar.
Teymur Tuşiyev
