Idman.biz
"Tottenhem Hotspur" sosial media səhifəsində 24 yaşlı cinah oyunçusu Brennan Consonun "Kristal Palas"a transfer olunduğunu elan edib.
İdman.Biz bildirir ki, jurnalist Fabrizio Romano daha əvvəl "qartallar"ın cinah oyunçusu üçün 33,5 milyon funt sterlinq (38,5 milyon avro) ödəyəcəyini bildirmişdi.
"24 yaşlı uelsli futbolçunun adı ötən mövsüm UEFA Avropa Liqasının finalında qələbə qolunun müəllifi kimi tariximizə əbədi həkk olunacaq. Onun vurduğu qol Bilbaoda "Mançester Yunayted" üzərində qələbəmizdə yeganə qol olub.
Brennana verdiyi töhfəyə görə təşəkkür edirik və ona gələcəkdə uğurlar arzulayırıq", - deyə London klubu açıqlamasında bildirib.
Conson 2023-cü ilin sentyabr ayından "Tottenhem"də çıxış edir. Bu müddət ərzində hücumçu bütün yarışlarda 106 oyun keçirib, 27 qol vurub və 18 məhsuldar ötürmə edib. Transfermarkt portalındakı məlumata görə, onun bazar dəyəri 35 milyon avrodur.
