İdman.biz
"Böyük beşlik" ölkələrinin ən yüksək liqalarında komandalar 12-15 arası oyun keçiriblər.
Fərqli liqalarda oyun sayındakı müəyyən fərq tam bərabərhüquqlu yanaşmaya imkan verməsə də, İdman.biz bu çempionatlarda ən məhsuldar futbolçuların statistikasını müxtəlif parametrlərdən nəzərdən keçirib.
5 liqada ən çox qol vuran Robert Levandoskidir ("Barselona", 15). Harri Keyn ("Bavariya") 14 qolla 2-ci, Omar Marmuş ("Ayntraxt") 13 qolla 3-cü göstəriciyə malikdir.
Ev oyunlarında ən çox Harri Keyn ("Bavariya") fərqlənib - 9. Erlinq Haland ("Mançester Siti"), Yoan Vissa və Brayan Mbuemo (hər ikisi "Brentford") doğma arenada 7 qol vurublar.
Səfər qollarında Robert Levandovskiyə ("Barselona") yaxın düşən yoxdur - 10. Omar Marmuş ("Ayntraxt") 8, Conatan David ("Lill") 7 dəfə meydan sahiblərini məyus edib.
18 yaşadək futbolçular arasında ən çox (5) qol vuran və ümumiyyətlə qol vuran ən gənc futbolçu 17 yaş 5 aylığında olan Lamin Yamaldır ("Barselona").
15 qollu Levandovski ("Barselona") ilə 35 yaşdan yuxarı futbolçular sırasında ən yaxından rəqabət aparan 5 qollu Yaqo Aspasdır ("Selta"). Ümumiyətlə qol vuran ən yaşlı futbolçu cəmi 1 dəfə fərqlənmiş Xesus Navasdır. "Sevilya"nın futbolçusunun 39 yaşı 12 gün bundan öncə tamam olub.
Cərimə meydançası daxilindən ən çox qolu Robert Levandovski ("Barselona", 14) və Harri Keyn ("Bavariya", 12) vurublar. Uzaq zərbələrdə isə 3 qollu Koul Palmer ("Çelsi"), Matteus Kunya ("Vulverhempton") və Federiko Valverde ("Real"Madrid) daha çox fərqləniblər.
Robert Levandovskiyə ("Barselona") sağ ayaqla vurulan qollarda ən məhsuldarlığa Omar Marmuş ("Ayntraxt") şərikdir. Hər ikisi 11 dəfə bu cür fərqlənib. Harri Keyn ("Bavariya") sağ ayaqla 10 qol vurub.
Məhəmməd Salah ("Liverpul") 11 qolunun hamısını sol ayaqla imza atıb. Erlinq Haland ("Mançester Siti") da sol ayağa üstünlük versə də, 12 qolunun 10-nu işlək ayağı ilə vurub. Ümumiyyətlə, solaxaylar daha çox Premyer Liqadadır. Koul Palmer ("Çelsi") və Brayan Mbuemo ("Brentford") 8 qolun hamısını solaxay zərbə ilə qapıdan keçirib. Premyer Liqa futbolçuları ilə bu sahədə digər liqalardan rəqabət apara bilən tək futbolçu 9 qolunun 8-ni solla vurmuş Rafinyadır ("Barselona").
Baş zərbələrinin sərrastları Tim Kleyndienst ("Borussiya"Mnxb.) və Mateo Retegidir ("Atalanta"). Hər ikisinin başla 4 qolu var.
Qapıya 20-dən çox zərbə vurmuş futbolçular arasında qolların nisbətində ən yüksək göstərici Kris Vuddadır. "Nottingem"in futbolçusu 22 zərbəsindən 9-nu, yəni 40,91 faizini qola çevirib. 40-dan çox zərbə vuranların liderləri isə 30,43 faizlə (46-dan 14) Harri Keyn ("Bavariya") və 29,41 (29,41) faizlə Robert Levandovskidir.
Vüqar Məmmədov
İdman.biz
