İdman.biz
"Qarabağ" Çempionlar Liqası ilə vidalaşıb.
İdman.biz xəbər verir ki, Azərbaycan çempionu pley-off səddini aşa bilməyib.
Qurban Qurbanovun yetirmələri Zaqreb "Dinamo"suna hər iki matçda uduzub. Ağdam təmsilçisi bu qarşılaşmalarda qol da vura bilməyib.
"Qarabağ" turu iki quruhesablı məğlubiyyətlə bitirib. Xorvatiyada üç cavabsız top buraxan təmsilçimiz evdə "2" alıb.
Qurban Qurbanovlu "Qarabağ"ın avrokubokların ikioyunluq duellərindən qolsuz ayrılması nadir hadisədir. Söhbət təsnifat, pley-off və qrupdan sonrakı mərhələlərdən "uduzan çıxır" prinsipli iki qarşılaşmadan gedir.
Sonuncu belə hadisə nə az, nə çox – 9 il əvvəl yaşanıb. Çempionlar Liqasında "Seltik" "Qarabağ" üçün "alınmaz qala"ya çevrilib. Qurbanovun komandası Şotlandiya klubuna iki matçda bir qol da vura bilməyib – 0:1, 0:0.
Amma Qlazqo təmsilçisi Bakıda qələbə qazana bilməyib. "Qarabağ"ın Qurbanovun gəlişindən sonra Avropada hər iki görüşdə uduzması və üstəlik qol da vurmaması isə "Dinamo"ya qədər yalnız bir dəfə olub.
Uzaq 2010-cu ildə Dortmund "Borussiya"sı hər iki matçda quru hesabla qalib gəlib. Bundesliqa klubu Avropa Liqası matçlarında elə "Dinamo" kimi ümumilikdə 5:0 hesabı ilə qələbə qazanıb – 4:0, 1:0.
Bir sözlə, "Qarabağ" Qurbanovlu dönəmində ikinci dəfə hər iki görüşdə quru hesabla uduzub, üçüncü dəfə iki dueldə qol vurmayıb.
Qeyd edək ki, "Qarabağ" Çempionlar Liqasından Avropa Liqasına yuvarlanıb.
İdman.biz
