İdman.biz
Avrokubokların 2024/25 mövsümü Azərbaycan üçün uğurlu başlayıb.
İdman.biz xəbər verir ki, Avropa Liqasının I təsnifat mərhələsinin ilk oyununu Moldovada "Şerif"ə qarşı keçirən "Zirə" 1:0 hesabı ilə qalib gəlib.
2555 günlük həsrətə son
"Zirə" avrokuboklardakı qol həsrətinə son qoyub. Bakılılar sonuncu dəfə "Astra" ilə 2017-ci il iyulun 13-də keçirilən matçda fərqlənmişdi. Avropa Liqasının II təsnifat mərhələsinin Rumıniyadakı görüşündə (1:3) Rəşad Sadiqov qol vurub. Bu, oyunun 34-cü dəqiqəsində baş verib. "Astra" ilə Bakıdakı qarşılaşmada (0:0), həmçinin Konfrans Liqasının iki il əvvəl Təl-Əviv "Makkabi"si ilə (0:3, 0:0) matçlarında təmsilçimiz qola həsrət qalıb. Davit Volkov zirəlilərin 2555 günlük həsrətinə son qoyub. Bunun üçün meydanda keçirilən 414 dəqiqə gözləmək lazım olub.
Qələbə də gəldi
Avropadakı son iki duelində "Astra" və "Makkabi" ilə eyni ssenari ilə üzləşən "Zirə" hərəsinə bir dəfə uduzub, bir dəfə bərabərə qalıb. Dörd qarşılaşmanı qələbəsiz bitirən komanda bu həsrətə də son qoyub. Son qalibiyyət 2562 gün əvvəl qeydə alınmışdı. Həmin vaxt zirəlilər Lüksemburqda "Differdanj"ı 2:1 hesabı ilə məğlub edib. Bu, 2017-ci il iyulun 6-da qeydə alınıb.
"Quru" ənənəsi
"Zirə" tarixində 4-cü quru oyununu keçirib. Avrokubokların hər duelində bir oyunda qol buraxmayan komanda "Şerif"lə görüşdə də qapısını toxunulmaz saxlayıb. "Differdanj" və "Astra"dan evdə, "Makkabi"dən səfərdə qol buraxmayan komanda ardıcıl ikinci səfərdən rəqib qoluna imkan verməyib.
"Şerif Arena"da toxunulmazlıq
Tarixdə ilk dəfə Azərbaycan klubu "Şerif"lə səfər oyununu qol buraxmadan tərk edib. İki dəfə Moldova klubu ilə görüşən "Qarabağ" hər dəfə bir top buraxıb. 2017-ci ildə təmsilçimiz 2:1 hesablı qələbə qazanıbsa, növbəti il meydan sahibləri bir qolla qalib gəlib. "Zirə" isə Tiraspolda qol buraxmadan qayıdıb.
Bombardir qolla qayıtdı
2020-22-ci illərdə vurduğu 22 qolla "Zirə"nin tarixində ən yaxşı bombardir olan Volkov qayıdışını qələbə topu ilə qeyd edib. O, sonuncu dəfə 776 gün əvvəl "qartallar"ın formasını geyinmişdi. 2022-ci il mayın 27-də "Qarabağ"la Azərbaycan kubokunun finalında (1:1, p.3:4) penaltilər seriyasında qol vura bilməyən gürcüstanlı dönüşünü qolla bəzəyib. Bu, onun "Zirə" forması ilə avrokuboklardakı debütü və ilk qolu olub. O, komandasının heyətində son dəfə 2022-ci il aprelin 24-də fərqlənmişdi. Növbəti qolunu 889 gün gözləyən legioner "Sumqayıt"la həmin matçda (1:0) da səfərdə sevinib. İndi 88-ci dəqiqədə qələbə qoluna imza atan Davit onda da 90+2-ci dəqiqədə qalibiyyətin səbəbkarı olub.
Qeyd edək ki, "Zirə" və "Şerif" arasında cavab oyunu iyulun 18-də Bakıda keçiriləcək.
Vüqar Xeyrullayev
İdman.biz
