İdman.biz
İFFHS avrokubokların ən uzun məğlubiyyətsizlik seriyalarını açıqlayıb.
İdman.biz Azərbaycan klublarının qitə kuboklarındakı analoji seriyalarını təqdim edir.
Təbii ki, təmsilçilərimizin ardıcıl 27 oyun uduzmayan "Mançester Siti"dən çox uzaq düşüb. Üstəlik, qitə nəhənglərinin seriyaları avrokubokların əsas mərhələləri ilə bağlı olub. Bizim klublar isə təsnifat və əsas mərhələlər qarışıq seriyalaa imza atıblar. Əlbəttə ki, bizim də öz "Mançester Siti"miz var.
Konfrans Liqasında uzun yol
Azərbaycan rekordu "Qarabağ"a məxsusdur. Qurban Qurbanovun komandası ardıcıl 11 oyunda uduzmayıb. Bu, təmsilçimizin Konfrans Liqasında oynadığı 2021/22 mövsümünə təsadüf edib. Əvvəlki mövsümü "Vilyarreal"dan aldığı texniki məğlubiyyətlə bitirən Ağdam klubu özü üçün yeni turnirdə üç təsnifat mərhələsini 6 matçda uduzmamamaqla keçib. Qrupdakı yeganə yenilgisi son turun "Bazel"lə qarşılaşmasına təsadüf edən "Qarabağ" əsas mərhələdə 5, ümumilikdə 11 görüşdə uduzmayıb. Bu müddətdə 7 qələbə və 4 heç-heçə qeydə alınıb. Hətta əgər texniki nəticəni ümumiyyətlə nəzərə almasaq, 2020/21 mövsümündə baş tutan son görüşdə Təl-Əviv "Makkabi"si ilə heç-heçə seriyanı 12-yə də çatdıra bilər. Amma texniki nəticələrin nəzərə alınıb-alınmaması ilə bağlı fərqli yanaşmalar mövcuddur.
Pley-offdan pley-offa
Azərbaycan klublarının ikinci ən uzun seriyası 7 oyundan ibarətdir. Bu rəqəmə 4 dəfə şahid olmuşuq. Ardıcıl 7 dəfə uduzmayan ilk komandamız "Qarabağ" olub. 2009-cu ildə Avropa Liqasının pley-offunda "Tvente"yə ilk matçdakı məğlubiyyətdən sonra Qurbanovun komandası nə cavab oyununda uduzub, nə də növbəti mövsümün ilk üç raudunda. Pley-offun ilk qarşılaşması Dortmund "Borussiya"sının 4 cavabsız qolu ilə yadda qalıb. Seriya 4 qələbə və 3 heç-heçədən ibarət olub.
Üç mövsümlük seriya
Həmin vaxt üçün rekord sayılan göstəricini təkrarlayan ilk komanda "İnter" olub. İndi "Şamaxı" adlanan komandanın seriyası üç fərqli mövsümü əhatə edib. 2010/11 mövsümünə qələbə ilə vida edən Bakı təmsilçisi bir il sonra Avropadan kənar qalıb. 2012-ci ilin yayında 4 oyun uduzmamaqla mövsümü bitirən komanda bir il sonra da iki məğlubiyyətsiz matç keçirib. Seriya Norveçdə "Tromse"dən 2 cavabsız qol buraxanda qırılıb. Bu müddətdə 4 qələbə və 3 heç-heçə yaşanıb.
Yenə almanlar
2013-cü ildə təkcə "İnter"in deyil, "Qarabağ"ın da növbəti 7 oyunluq seriyası qırılıb. İki il əvvəl Avropa Liqasında III mərhələnin ilk görüşündə "Brügge"yə 1:3 hesabı uduzan Qurbanovun yetirmələri Bakıdakı cavab matçında qalib gəlib və növbəti mövsümdə Avropaya çıxa bilməyib. 2013/14 mövsümündə ilk üç raundda uduzmadan pley-offa yüksələn komanda yen Almaniya klubuna rəqib olub. Bu dəfə "Borussiya" deyil, "Ayntraxt" seriyanı qırıb. Almanlar ilk oyunda 2 cavabsız qola sevinib. Seriya isə 6 qələbə və 1 heç-heçə ilə diqqət çəkib.
Polşadan Leverkuzenə
Azərbaycan klublarının ən azı 7 avrokubok matçında uduzmaması sonuncu dəfə ötən il yaşanıb. Yenə "Qarabağ" və yenə Almaniya klubunun qırdığı seriya... Çempionlar Liqasında II təsnifat mərhələsinə Polşada "Rakuv"a 2:3 hesablı məğlubiyyətlə başlayan Ağdam klubu evdə heç-heçə oynayıb. Avropa Liqasına düşdükdən sonra təsnifatda 4, qrupda 2 matç məğlubiyyətsiz bitib. Leverkuzen səfərində "Bayer"dən xal almaq mümkün olmayıb – 1:5. Mövsümün 7 oyunluq bölümü 5 qələbə və 2 heç-heçə ilə əlamətdar olub.
Qeyd edək ki, beş ən yaxşı seriyadan başqa, "Bakı", "Qarabağ" və "Qəbələ"nin hərəsi bir dəfə 6 ardıcıl matçda uduzmayıb.
Vüqar Xeyrullayev
İdman.biz
