Bizim daha çox qol epizodumuz var idi - Elvin Məmmədov

"Çətin oyun olacağını bilirdik. Rəqibin keyfiyyətinə bələdik. Turnir cədvəlində yuxarı pillədə qərarlaşıblar. Futbolçularım əzmkar mübarizə apardılar. Son dəqiqələrdə ikinci qolumuzu vursaydıq, qələbəni qeyd edə bilərdik. Şükürlər olsun ki, uduzmadıq. Qarşıdakı görüşləri düşünüb, çatışmazlıqları aradan qaldırmağa çalışacağıq".

QOL.az xəbər verir ki, bu sözləri "Səbail"in baş məşqçisi Elvin Məmmədov Misli Premyer Liqasının 32-ci turunda "Araz-Naxçıvan"la 1:1 heç-heçə etdikləri oyundan sonra deyib. 

O, görüşdən sonra təşkil olunan mətbuat konfransında jurnalistlərin suallarını da cavablandırıb:

- Premyer Liqada qalmaq şansını Madi Ketanın son dəqiqələrdə əldən verdiyi qol epizodunu boşa verməklə əldən çıxdığını demək olar?

- Ümidimizi itirmirik. Qarşıda 4 oyun var, hər şey ola bilər. Niyə olmasın? Biz onlara güvən verməliyik ki, onların sayəsində bu durumdan çıxaq. Biz ümidliyik. Sona qədər mübarizə aparacağıq.

- Qalib gəlsəydiniz, "Kəpəz"lə xal fərqiniz 5-ə enəcəkdi. Gəncə klubu ilə müqayisədə, son 4 turda sizi daha uyğun rəqiblərlə oyunlar gözləyir...

- Hər bir oyun bizim üçün çətindir. Qarşıdakı turda "Şamaxı" ilə oyunumuz var. Ayxan müəllimin komandası həm fiziki, həm də taktiki cəhətdən hazırdır. Bizə də hər oyuna çətindir. Fərqindəyik. Yalnız pozitiv danışaraq bu durumdan çıxa bilərik.

- Demək olar ki, bu gün iki xal itirdiniz?

- Rəqibə qarşı hörmətsizlik kimi çıxmasın, amma bu gün bizim qol epizodlarımız daha çox idi. Son dəqiqələrdə Madi epizodu vursaydı, üç xal qazansaydıq, daha gözəl olardı.

- "Kəpəz"i qarşıda "Neftçi", "Qarabağ" və "Turan Tovuz"la ağır oyunları var. Sizdə isə qrafik bir qədər yumşaqdır. Bu sizə ruh yüksəkliyi gətirir?

- Dediyinizi biz də analiz edirik. Ümidimizi üzmürük. Futbolda hər şey mümkündür. Allah qoysa, bu durumdan çıxaq, ondan sonra başqa söhbətlər edək.

- "Zirə" ilə görüşdə son saniyələrdə qol buraxdınız, bu gün Rüfət Abdullazadənin tirdən qayıdan zərbələri var idi. Hətta vurduğunuz qol zamanı top da qapıya daxil olmaq istəmirdi. Sanki şanssızlıq yaşayırsınız?

- Biz ümidimizi üzmürük. Təki Allah bizə kömək olsun. Ən sonda qisməti verən Allahdır. Nəsibimizdə varsa, olacaq. (sportal.az)