“Bizi belə sıxışdırmaq istəyirlərsə, alınmayacaq”

Misli Premyer Liqasının XXIII turunda "Turan Tovuz" – "Araz-Naxçıvan" (1:0) matçından sonra qonaq komandanın baş məşqçisi Elmar Baxşıyev jurnalistlərin suallarını cavablandırıb. Sport24.az xəbər verir ki, mütəxəssis əvvəlcə görüşlə bağlı fikirlərini bölüşüb:

– Ağır oyun keçdi. Hər iki komanda meydanda yaxşı mübarizə apardı. Nə düşünürdüksə, komanda onu etməyə çalışdı. Hazırlıqlı gəlmişdik. Yola davam etmək lazımdır.

– Qırmızı vərəqə epizoduyla bağlı nə deyə bilərsiz?

– Sizcə, qırmızı var idi? Təkrara baxdım. Heç orada sarılıq bir şey də yox idi. Bizi belə sıxışdırmaq istəyirlərsə, alınmayacaq. Komandamız möhkəmdir. Biz də fərqli görürük, fərqli yanaşmaq istəyirik. Keçən turda da "Kəpəz"lə oyunun 3-cü dəqiqəsində Ülvi İsgəndərovun epizoduna baxmırlar, amma sonradan baxırlar.

– Oyundan sonra Zaur Axundovla nə danışdız?

– Ümumən ev oyunlarından sonra da Zaur müəllimlə görüş olur, öz dəstəyini əsirgəmir.

– "Turan Tovuz"a, "Araz-Naxçıvan"a qarşı hakim səhvləri olur. Sizcə, kimin qabağını açırlar?

– Heç bir komandanın haqqına girmək istəmərik. Futbol ədalət tələb edir. Düşünürəm ki, futbolda varlı, kasıb anlayışı olmamalıdır. Onların fərqli düşündükləri var. Bizim üzərimizə nə düşürsə, onu edirik.

– "Zirə" qovur, "Araz-Naxçıvan" qaçır. İkinci yeri qoruyub saxlamaq kimi komanda üzərində təzyiq var?

– Hər bir sahədə təzyiq olmalıdır. Bu insanı daha məsuliyyətli edir. Komanda meydançada üstündürsə, o, təzyiq altında ola bilməz.