İdman.biz
"Hər kəs bu iki böyük klubun qarşılaşmasını maraqla gözləyir".
Bunu İdman.bizə Azərbaycan millisinin veteran futbolçusu Bəxtiyar Musayev deyib.
O, Azərbaycan Premyer Liqasının 15 turunda keçiriləcək "Neftçi" - "Qarabağ" matçını dəyərləndirib. Hər iki klubun formasını geyinmiş Musayevin sözlərinə görə, çox baxımlı oyun olacaq: "Son zamanlar "Qarabağ" çempionatda stabil çıxışı ilə qələbələrini sıralayır. "Neftçi"də isə qeyri-stabil oyunlar davam edir. Bu il də "ağ-qaralar"da start çox acınacaqlı alındı. Çox xallar itirildi. Matça gəlincə, "Qarabağ" çətin "Lion" qarşılaşmasından sonra yəqin ki, start heyətin bir neçə oyunçusuna istirahət verəcək. "Neftçi" isə bundan istifadə etməyə çalışacaq. Hətta bunu etməlidir. Çünki əsas heyətin bir neçə futbolçusunun olmaması təbii ki, "Qarabağ"a bir az problem yarada bilər. Lakin onlar digər klublarından birbaşa üstün olduğuna görə hətta start heyətini tam dəyişəndə də qələbəsini qazanır. Ümid edirəm ki, gözəl və bolqollu qarşılaşmanın şahidi olacağıq".
Azərbaycan derbisi dekabrın 1-də "Neftçi Arena"da saat 19:00-da start götürəcək.
Qeyd edək ki, rəqiblərindən bir oyun az keçirən "Qarabağ" 34 xalla turnir cədvəlində ikinci, "Neftçi" isə 13 xalla 8-ci yerdədir.
Banuçiçək Hüseynli
İdman.biz
