Idman.biz
"Çətin oyun olacaq".
İdman.biz xəbər verir ki, bunu Offsideplus.az saytına açıqlamasında AFFA-nın Texniki departamentin Skautlar şöbəsinin rəisi, veteran futbolçu Bəxtiyar Musayev deyib.
Vaxtilə "Qarabağ"ın formasını geyinən veteran futbolçu Azərbaycan çempionunun UEFA Çempionlar Liqasının əsas mərhələsinin I turunda "Benfika"ya qarşı keçirəcəyi oyunla bağlı fikirlərini bölüşüb: "Əvvəlcə, bizə Çempionlar Liqası həyəcanı yaşatdığına görə "Qarabağ"a təşəkkür edirəm. Çox çətin səfərdir. Bilirik ki, "Benfika" komandası ilə ev oyunlarında top komandalar belə əziyyət çəkirlər. Köklü klubdur. Ümid edirəm ki, "Qarabağ" bu gün layiqli mübarizə aparar, gözəl oyunu ilə bizi sevindirər. Çünki son vaxtlar komandamızın hətta rəqib meydanında belə parlaq çıxışını izləyirik".
Mütəxəssis "Qarabağ" azarkeşlərinin hücumçu transferi ilə bağlı narahatlığından da danışıb: "Komanda çoxdandır hücumçu axtarışında idi. Qurban müəllimin də dediyi kimi layiqli oyunçu istəyirdilər. Bilirik ki, "Qarabağ" heç vaxt transfer xətrinə transfer etmir. Bu dəfə istədikləri hücumçunu cəlb edə bilmədilər. Düşünürəm ki, Qurban müəllimin "B" planı da var. Yəqin ki, çıxış yolu kimi hər hansı taktiki gedişdən istifadə edəcək. Məlum məsələdir ki, komandada rəqabət güclü olanda məşqçi işi də asan olur.
Digər tərəfdən Nərimanın olmamağı da bu oyunda çətinlik yaradacaq. O, "Ferentsvaroş"la görüşdə yaxşı çıxış etmişdi. Ümid edirəm ki, hücumçu transferi ilə bağlı yaranmış əskikliyin bir həll yolu tapılar. Bizə yalnız uğurlar arzulamaq düşür. Komandamızdan layiqli, parlaq oyun gözləyirəm".
Qeyd edək ki, "Benfika" - "Qarabağ" matçı bu gün, Bakı vaxtı ilə saat 23:00-da Lissabondakı "Eştadiu da Luş" stadionunda start götürəcək.
İdman.biz
