Bəxtiyar Həsənalızadə: "Rəqiblər güclənsə də, Ağdam təmsilçisi istənilən halda..."

Mövsümlərarası fasilədə "Araz-Naxçıvan"la müqavilə bağlayan Bəxtiyar Həsənalızadə "Qarabağ"la matçdan sonra Sport24.az-ın əməkdaşının suallarını cavablandırıb. Ötən mövsüm Türkiyədə legioner həyatı yaşayan təxrübəli müdafiəçi həm komandasının durumundan danışıb, həm də yeni mövsümlə bağlı şansları dəyərləndirib.

- Mövsümün ilk oyununda "Qarabağ"a yenildiz. Böyükhesablı məğlubiyyətin səbəbini bilmək istərdik...
- Mövsümün ilk oyunu həmişə çətin olur. Bundan başqa rəqibimizdə sıradan bir komanda yox, Avropa səviyyəli "Qarabağ"dı. Həmçinin ağdamlılar bizdə əvvəl toplanışa başlayıb, Çempionlar Liqasında iki matç keçirib. Belə hazırlıqlı və heyətində yüksək səviyyətli oyunçuları olan kluba qarşı oynamaq olduqca çətindi. Kollektivimizdə hələ bütün oyunçular bir-birinə öyrəşməyib. Amma bu məğlubiyyətdən dərs çıxarıb qarşıdakı turlarda daha yaxşı çıxış edəcəyik.

- 9 dəqiqəyə qapınızda iki qol gördüz. Bu müdafiənin zəif olmasından irəli gəlir, yoxsa...
- Qeyd etdiyim kimi "Qarabağ"ın gücü, səviyyəsi hamıya məlumdu. Rəqibin ilk dəqiqələrdən güclü təzyiqi nəticəsində səhvlərə yol verdik və ardıcıl qollar buraxdıq. Belə bir komandayla görüşdə 2 top fərq ilə geri düşürsənsə, geridönüş etmək çox çətindi. Buna baxmayaraq, bacardığımız qədər mübarizə apardıq, hücumlar təşkil etdik, qol vurduq. Bu yalnız təsəlli qolu yox, həm də qarşıdakı oyunlara motivasiya deməkdi.

- Erkən qollar olmasaydı, fərqli nəticə qeydə alına bilərdi?  
- Fikrimcə, rəqibin hücumlarını qarşısını alıb ilk 15-20 dəqiqə dözsək pis olmazdı. Əlbəttə, fasiləyə qədər qapımızda qol görməsəydik, xal götürmək şansımız olar. Amma bu oyub artıq bitib. Geriyə yox, irəli baxmaq lazımdı.

- Öz oyunun barədə hansı fikirdəsən?  
- Təbii ki, ürəkaçan deyil. Özüm də daxil, bütün kollektiv hələ tam istədiyimiz formada deyil. Hər birimiz məsuliyyəti anlayıb, üzərimizdə daha çox çalışmalıyıq.

- "Sabah"ın formasını geyindin, sonra Türkiyədə legioner həyatı yaşadın, hazırda isə "Araz-Naxçıvan"dasan. Karyerandakı bu cür yerdəyişmələri necə dəyərləndirərdin?
- Ümumi götürəndə "Sabah"da karyeram uğurlu alındı. Türkiyədə də pis olmadı. Düşünürəm ki, "Araz-Naxçıvan"da da karyeram istədiyim kimi alınacaq. Sadəcə, bir qədər vaxta ehtiyac var.

- Sabiq klubun "Sabah" Konfrans Liqasında "Makkabi"ni penaltilər seriyasında üstələdi. Belə deyək, bir qədər də bəxti gətirdi. Sən necə düşünürsən?  

- Bəxt sayəsində mərhələni adladı deməzdim. Istənilən sahədə, o cümlədən futbolda əziyyət çəkirsənsə bəhrəsini görürsən. İlk oyunda "bayquşlar" səfərdə üstün oynayıb layiqli qələbə qazandı. Mərhələ keçmək "Sabah"ın haqqı idi. Sadəcə, "Sabah" bunu çətinliklə əldə etdi.

- Necə düşünürsən, bu mövsüm "Sabah" ilə "Neftçi" "Qarabağ"ı büdrədə biləcək?
- "Sabah" yaxşı formadadı. "Neftçi"də isə yeni baş məşqçi və təzə oyunçular gəlib. Hər iki komandanın potensialı var. Rəqiblər güclənsə də, Ağdam təmsilçisi istənilən halda çempionatın favoritidi.

ABDULLA İSMAYILOĞLU