Sport24.az
"Oyun yorğunluq fonunda bizim üçün çətin keçdi". Bu sözləri Sport24.az-a açıqlamasında "Araz-Naxçıvan"ın futbolçusu Bəxtiyar Həsənalızadə deyib.
Müdafiəçi "Zirə" ilə heç-heçə (1:1) etdikləri Misli Premyer Liqasının I turunun oyunu ilə bağlı fikirlərini bölüşüb:
"Rəqib iddialı komandadır. Ötən mövsüm Premyer Liqada 2-ci yeri tutublar. Matça ciddi hazırlaşmışdıq. Uzun səfərdən qayıtmışdıq. Bütün bunlara baxmayaraq, meydana çıxdıq və sona qədər mübarizə apardıq. Oyun olaraq istədiyimiz edə bilməsək də ən azından xal qazandıq".
Həsənalızadə UEFA Konfrans Liqasında Kipr təmsilçisi "Omoniya" ilə görüşdən sonra çempionat qarşılaşmasına köklənməyin ağır olduğunu söyləyib:
"Bir az psixoloji baxımdan ağır idi. Xarakter lazım idi ki, dəyişiklik edək. Hər iki matçda da ağır məğlubiyyət yaşamışdıq. Həm də səfərin uzun olması bizi fiziki olaraq yormuşdu. Oyun olaraq "Zirə" ilə matçda istədiyimizi verə bilmədik. Amma nəticə qənaətbəxşdir".
O, bərabərlik qolunu vurması ilə bağlı da danışıb:
"Deyiləsi bir şey yoxdur. Sadəcə, hiss etdim ki, top o istiqamətə gələcək. Mən də ora qaçdım. Şərait yarandı, şükürlər olsun ki, istifadə etdim".
Həsənalızadə Naxçıvan təmsilçisinin cari mövsümdəki hədəflərindən də söz açıb:
"İstəyimiz avrokuboklara düşməkdir. Sonrakı mərhələdə necə olacaq, bilmirəm. Amma avrokuboklara vəsiqə qazanmaq niyyətindəyik. Təbii ki, medalçılar sırasına da düşmək istəyirik".
