Bəxtiyar Həsənalızadə: “Hədəflərin nə olacağı hələ bizə deyilməyib”

"Türkiyədə klubla bağlı problem olduğu üçün Azərbaycana döndüm".

Bunu İdman.bizə "Araz-Naxçıvan"nın yeni transferi Bəxtiyar Həsənalızadə deyib.

Azərbaycan millisinin 31 yaşlı müdafiəçisi keçidi şərh edib. O bildirib ki, yeni komandasında hədəfləri böyük olacaq: "Araz-Naxçıvan"la yanaşı, başqa klublarımızdan da təkliflər var idi. Naxçıvan klubu məni komandada görməkdə daha istəkli olduğu üçün bu seçimi etdim. Etimadı doğruldub, əsas heyətə düşmək üçün əlimdən gələni edəcəm. Komandada yaxşı futbolçular, yaxşı yeni transferlər var. Mən gəldikdən sonra rəhbərliklə görüş olmayıb. Hədəflərin nə olacağı hələ bizə deyilməyib. Yəqin ki, yüksək hədəflər uğrunda oynayacağıq. Komandanın heyəti buna imkan verir. Mövsüm ərzində yaxşı oyun göstərib milliyə qayıtmağa çalışacağam".

Həsənalızadə Naxçıvan klubunu seçməsində baş məşqçi Elmar Baxşıyev amilinin də önəmli rol oynadığını bildirib: "Onunla birlikdə işləməsək də, haqqında çox müsbət rəylər eşitmişəm. Bu həm məşqçi, həm də insan kimi belədir. Təbii ki, Elmar müəllimin burda olmağı mənim üçün rahatçılıqdır və üstünlükdür".

Bəxtiyar son klubu olan Türkiyə aşağı dəstə təmsilçisi "Tuzlaspor"dan problemli şəkildə ayrıldığını da deyib: "Məhkəmə prosesi gedir. Ödənişlərlə bağlı gecikmələr var".

Qeyd edək ki, Həsənalızadə "Tuzlaspor"la yanaşı, "Sumqayıt", "Zirə" və "Sabah" klublarının da şərəfini qoruyub.

Emin Ağa
İdman.biz