Idman.biz
"Mahirin yeni komandasında uğur qazanacağını düşünürəm. Hətta o, Bundesliqada da forma geyinə bilər. Çünki yüksəksəviyyəli liqalarda oynamaq üçün bütün fiziki və texniki imkanlara malikdir".
İdman.biz xəbər verir ki, bu sözləri AZƏRTAC-a açıqlamasında vaxtilə Azərbaycan millisində Berti Foqtsun köməkçisi işləmiş almaniyalı mütəxəssis Bernhard Lippert 2-ci Bundesliqa təmsilçisi "Kayzerslautern"ə transfer olunan Azərbaycan millisinin futbolçusu Mahir Emreli barədə danışarkən deyib.
O, 28 yaşlı forvardın yeni klubuna öyrəşəcəyi təqdirdə, daha yaxşı çıxış edə biləcəyini söyləyib: "O, keçmiş komandası "Nürnberq"də həm yüksək, həm də ortasəviyyəli matçlar keçirdi. Fikrimcə bu, "Nürnberq"in bütün mövsüm boyu göstərdiyi performansa bənzəyirdi. Emreli sanki komandasının oyununu əks etdirən bir güzgü idi. Əslində, daha böyük potensiala malikdir. Ümid edirəm ki, yeni mühitdə - "Kayzerslautern"də bacarığını tam şəkildə göstərə biləcək".
O, "Kayzerslautern"in Bundesliqaya yüksəlmək potensialına malik olduğunu istisna etməyib: "Komanda yeni mövsüm üçün kifayət qədər güclü heyət formalaşdırır. Bu baxımdan iddialı görünürlər".
Qeyd edək ki, Mahir Emreli Almaniya klubu ilə 3 illik müqavilə imzalayıb.
İdman.biz
