Lent.az
Portuqaliyanın "Benfika" futbol klubunun prezidenti Rui Koşta məhkəməyə cavabdeh qismində çağırılıb.
Lent.az xarici mediaya istinadla xəbər verir ki, buna səbəb Koştanın Rusiyanın "Lokomotiv" klubundan 76 min avro məbləğində pul köçürməsi alması ilə bağlıdır.
Bu vəsait 2023-cü ildə argentinalı futbolçu Herman Kontinin "Lokomotiv" klubuna transferi ilə bağlı ödənişin bir hissəsi olub. Lakin bu əməliyyat Rusiya ilə əlaqəli təşkilatlarla maliyyə əməliyyatlarını qadağan edən Avropa sanksiya qanunvericiliyinin pozulması kimi qiymətləndirilib.
Koşta ötən ilin iyul ayında məhkəmədə ifadə verməli idi, lakin ona möhlət verildi. Portuqaliya qanunvericiliyinə əsasən, beynəlxalq sanksiyaların pozulması cinayəti 1 ildən 5 ilə qədər azadlıqdan məhrumetmə ilə cəzalandırıla bilər. Məlumata görə, prokurorluq cərimə ödənişindən sonra işin müvəqqəti dayandırılması barədə vəsatət qaldırmağı planlaşdırır.
Xatırladaq ki, Herman Kontinin "Lokomotiv" klubuna keçidi 2023-cü ilin yanvarında baş tutub, transferin ümumi məbləği 2 milyon avro təşkil edib.
Qeyd edək ki, sentyabrın 17-də UEFA Çempionlar Liqasında Liqa mərhələsinin birinci turunda "Qarabağ" "Benfika"nı 3:2 hesabı ilə məğlub edib.
