Bəhlul Mustafazadə: "Bu barədə düşünmək belə istəmirik"

 Çempionlar Liqasının III təsnifat mərhələsinin ilk oyununda "Qarabağ" "doğma divarlar" arasında "Ludoqorets"ə məğlub oldu. Matçdan sonra ağdamlıların müdafiəçisi Bəhlul Mustafazadə Sport24.az-ın əməkdaşının suallarını cavablandırıb.

-  Bu günkü məğlubiyyətlə bağlı fikirlərini bilmək istərdik...
- Son 3 oyunda 3 qələbə qazanıb, rəqib qapılarından 11 top keçirmişik. Bunu ardını gətirmək istəyirdik. Təssüf ki, Bolqarıstan təmsilçisiylə matçda əlimizə düşən fürsətləri dəyərləndirə bilmədik. Rəqib isə əksinə, şanslardan maksimum istifadə etdi və bizi cəzalandı.

- Bu oyunda müdafiədə yetərincə boşluqlar verdiz...  
- Hesab edirəm ki, bu gün arxa xətdə daha yaxşı performans sərgiləyə bilərdik. Təəssüf ki, bacarmadıq.

- Bolqarıstan təmsilçisinə qol vursan da, ofsayt qeydə alındı...
- Səmimi deyim ki, epizodun təkrarına baxmamışam. Lakin ofsayt qeydə alınıbsa, deməli, düzgün qərar verilib. Ən azı VAR-da mövcuddu. Mübahisəli məqam olsaydı, epizod monitorda incələnərdi.

- Necə düşünürsən, səfərdə məğlubiyyətin əvəzini çıxmaq olar?  
- Hələ heç nə bitməyib. Qarşılaşmanın ikinci pərdəsi var və şanslar bərabərdi. Bolqarıstanda maksimum gücümüzü ortaya qoyacağıq. Məqsədimiz qələbə qazanıb növbəti mərhələyə keçməkdi.

- "Ludoqorets"ə məğlub olub ÇL-dən kənar qalmağı faciə hesab etməyəcəksiz?
- Bu barədə düşünmək belə istəmirik. Hələ heç nə bitməyib, Bakıda yol verdiyimiz səhvləri cavab matçında etməməyə çalışacaq və zəfər qazanmağa köklənəcəyik.

ABDULA İSMAYILOĞLU