Sport24.az
"Qarabağ"ın müdafiəçisi Bəhlul Mustafazadə Sport24.az-a müsahibə verib. "Dinamo" ilə matçı şərh edən Mustafazadə bizi maraqlandıran başqa sualları da cavablandırıb.
- Qələbə üçün nə çatmadı?
- Eynən ilk oyunda olduğu kimi bu matçda da əlimizə düşən fürsətləri boşa verməyin qurbanı olduq.
- Müdafiənin belə zəif təsir bağışlamasını necə izah edərdin?
- Müdafiə elə mövqedir ki, 100 hücumdan 99-un qarşısını al, amma bir boşluq ver və ya səhv et, daim acısını çəkirsən. Maksimum çalışdıq ki, arxada səhvsiz oynayaq. Təəssüf ki, alınmadı. Ani diqqətsizlikdən qapımızda iki qol gördük. Çalışacağıq qarşıdakı matçlarda belə səhvlərə yol verməyək.
- Kevin Medina son dəqiqələrdə meydandan qovuldu. Səncə, hakim haqlı qərar verdi?
- Hakimlik barədə danışmaq istəmirəm. Onun qərarını müzakirə etmək artıq heç nəyi dəyişməyəcək.
- Mübarizəyə Avropa Liqasının qrupunda davam edəcəksiz. Bu mərhələdə nəyə ümid edirsiz?
- Ötənilki nəticəmizi daha da yaxşılaşdırmaq istəyirik. Avropa Liqasında yetəri qədər təcrübəmiz var və maksimum irəli getməyə çalışacağıq.
- "Qarabağ"a yeni qoşulan Mateuş Koxalski barədə fikirlərin maraqlıdı…
- Koxalski yaxşı qapıçıdı. Onun yaxşı fiziki göstəriciləri var. Polşa çempionatında özünü sübut etmiş qolkiperdi.
ABDULLA İSMAYILOĞLU
