Bədavi Hüseynov: "Bəzən olur ki, böyük uğurlar məğlubiyyətlərdən doğur"

"Qarabağ"ın kapitanı Bədavi Hüseynov Sport24.az-a müsahibə verib. Təcrübəli müdafiəçi həm "Dinamo" ilə oyunlar barədə danışıb, həm də qarşıdakı matçlar haqda fikirlərini bölüşüb. 

- "Dinamo" ilə  oyunlar barədə fikirlərin maraqlıdı...

- Bizə qələbə lazım idi. Cavab qarşılaşmasında ilk dəqiqələrdən pressinq tətbiq etdik. Amma yenə də əlimizə düşən fürsətləri boşa verdik. Rəqib isə əksinə, yenə yaxaladığı fürsətlərdən maksimun yararlandı.

- İlk qoldan sonra komanda sanki ruhdan düşdü?

- Rəqib gözləmədiyimiz anda cərimə meydançasının xaricindən qapımıza yol tapdı. Bu da təbii ki, vəziyyətimizi bir qədər də çətinləşdirdi.

- "Qarabağ"ın müdafiəsi niyə bu qədər zəif təsir bağışladı?

- Var gücümüzlə mübarizə aparıb geridönüş etmək istəyirdik. Alımadı. Müdafiədə də sayıq olmadıq. Rəqibin də haqqını vermək lazımdı. Xorvatlar yaxşı formadadı, heyətlərində səviyyəli oyunçular var. Zaqreb təmsilçisi sıradan komanda deyil, onların yetərincə avrokubok təcrübəsi var. "Dinamo" bizi səhvlər etməyə məcbur etdi. Aldığımız iki məğlubiyyət bizim üçün ciddi dərs olacaq və nöqsanlarımız  üzərində çalışacağıq. İrəlidə bizi Avropa Liqasında çətin sınaq gözləyir.

- Premyer Liqanın son matçında "Turan Tovuz"a məğlub olduz…

- Həqiqətən də "Turan Tovuz" xoş sözlərə layiqdi. Kurban Berdıyev çox təcrübəli, iddialı mütəxəssisdi və onun gördüyü işlər bəhrəsini verməkdədi. Fikrimcə, tovuzlular bu il ilk "üçlük" uğrunda mübarizə aparacaqlar.

- Ardıcıl 3 məğlubiyyət "Qarabağ" düşərgəsində psixoloji tənəzzülə yol açmayacaq?

- Futbolda hər cür nəticə olur. Bəzən olur ki, böyük uğurlar məğlubiyyətlərdən doğur. Biz peşəkar komandayıq və yıxılıb qalxmağı bacarırıq. Odur ki, son məğlubiyyətlərimizi faciə kimi qəbul olunmamalıdı. Əksinə, komandanın toparlanması üçün bu lazım idi.

 ABDULLA İSMAYILOĞLU