Bədavi Hüseynov: “Kiməsə mesaj göndərmədik, sadəcə..." - Müsahibə

Ötən gün XXXIII ölkə çempionatının ilk turunun açılış oyununda "Qarabağ" "Araz-Naxçıvan" 4:1 hesabı ilə məğlub etdi. Qarşılaşmadan sonra "süvarilər"in kapitanı Bədavi Hüseynov Sport24.az-ın əməkdaşının suallarını cavablandırıb. Hüseynov həm çempionat, həm də Çempionlar Liqasında (ÇL) keçirdikləri oyunlarla bağlı fikirlərini bölüşüb.

- Öncə Çempionlar Liqasında keçirdiyiniz oyunlarla bağlı fikirlərini bölüşərdin...
- ÇL-ə qələbəylə başlamağımıza sevinirik. Rəqibi yaxşı təhlil etmişdik. Səfərdə qələbə qazansaq da, bu nəticəni unudub cavab matçına daha ciddi hazırlaşdıq və Bakıdakı oyunda böyükhesablı qələbə ilə mərhələ keçdik. Hazırda növbəti mərhələdə rəqibimiz olacaq Bolqarıstan klubunu təhlil etməklə məşğuluq.

- "Linkoln"la cavab qarşılaşmasında Juninyo "het-trik"lə yadda qaldı. Ondan belə performans gözləyirdin?  
- Juninyo çox səviyyəli oyunçudu. Onun ötən mövsüm Avropa Liqasında "Bayer"ə qarşı matçda sərgilədiyi oyuna baxmaq kifayətdi. Fikrimcə, o, bir qədər də üzərində çalışıb inkişaf edə bilər. Onun buna potensialı var.

- Necə düşünürsən, Juninyonu "milliləşdir"sək yığmaya fayda verə bilər?
- Məndən olsa, bir an belə düşünmədən onu Azərbaycan millisinə cəlb edərəm. Amma reallıq odur ki, Juninyo legionerdi və ən azı 5 il ölkəmizdə çıxış etməlidi. Təbii ki, "18 nömrə"miz Riçard Almeyda kimi 5 ilini tamamlasa və özü də istəsə onun yığmaya cəlb etmək olar. Amma bu barədə indidən nəsə demək olmaz. Legioner futbolçunu bir ölkənin əsas komandasına qazandırmaq zamana, tələbə, istəyə bağlı məsələdi.

- Maksim Medvedev artıq karyerasını başa vurub. İndi kapitan və təcrübəli futbolçu kimi sən onun yerini tutmusan. Maksimin yerini doldura biləcəksən?
- Medvedev "Qarabağ" üçün illərini vermiş  yüksək səviyyədə çıxış etmiş futbolçu idi. Əlbəttə onun yeri görünəcək. Hamımız bir gün butslarımızı mismardan asacağıq. Bu futbolun reallığıdı. Həmçinin əvəzolunmaq futbolçu yoxdu deyimini də unutmamalıyıq. Hazırda klubun yetirmələri də üzə çıxmaqdadı. Onlar çox istəklidi. Həmçinin peşəkar klub olaraq daim inkişaf etməli, çatışmazlığa yol verməməyə çalışmalıyıq.

- Yeni mövsümə böyükhesablı qələbəylə başladız. Bunu rəqiblərinizə mesaj kimi qəbul etmək olar?
- ÇL-lə ilə yanaşı, ölkə çempionatına da uğurla başlamaq istəyirdik. Premyer Liqanın açılış matçında vacib qələbə qazandığımıza sevinirəm. Kiməsə mesaj göndərmədik, sadəcə, meydana çıxıb qarşımıza qoyulan tapşırığı yerinə yetirdik.

- Yeni futbol ilində "Neftçi" yeni baş məşqçi ilə anlaşıb. Əzəli rəqibiniz çox istəklidi. Çempionluq uğrunda mübarizədə büdrəyəcəyinizdən qorxmursan?

- "Neftçi"dəki dəyişikliklər və həyata keçirdiyi islahatlar göz qabağındadı. Yalnız "ağ-qaralar"ı yox, digər klublarımızın da gücləndiyini deyə bilərəm. "Zirə" ilə "Sabah"ın avrokuboklarda uğurlu çıxışını yaddan çıxarmayaq. Həmçinin "Turan Tovuz"un bu mövsüm istəkli olacağını, rəqiblərə başağrı yaradacağını düşünürəm. Qısası, 2024/25-ci il mövsümündə bizi gərgin, rəqabətli və maraqlı çempionat gözləyir.

ABDULLA İSMAYILOĞLU